फुङलिङ जल्दा म्याङलुङलाई पोल्यो

ताप्लेजुङका अग्नि पीडितका लागि राहत संकलन गर्दै तेह्रथुमका बासिन्दा

१० चैत, काठमाडौं । आगोले पोल्दा कति दुख्छ भन्ने पीडा शायद जल्नेहरुलाई नै थाहा हुन्छ । त्यसैले होला ताप्लेजुङको सदरमुकाम फुङलिङमा आगलागी भएको सुन्नासाथ तेह्रथुम सदरमुकाम म्याङलुङका जनताले स्वतस्फूर्त रुपमा राहत संकलन गर्न थालेका छन् ।

त्यसो त म्याङ्गलुङ्गमा ०५९ साल मंसिर २२ गते भीषण आगलागी हुँदा फुङलिङले पनि यसैगरी सहयोग संकलन गरेर पठाएको थियो ।

आगोले पोल्दा कस्तो पीडा हुन्छ भन्ने थाहा पाएरै होला म्याङलुङबासीहरु सहयोगको हात अघि बढाउन सबैभन्दा बढी अग्रसर भएका छन् ।

नेपालको सुदूरपूर्वका जनतामा प्रकोपको खबर सुने पनि राजधानी र अन्य जिल्लाका बासिन्दाहरुलाई म्याङलुङवासीमा जस्तो तातो लागिसकेको छैन ।

तेह्रथुम जिल्लास्थित दैवी प्रकोप उद्दार समिति, तेह्रथुम उद्योग वाणिज्य संघ, स्थानीय शान्ति समिति र नेपाल पत्रकार महासंघले संयुक्तरुपमा राहत संकलन सुरु गरेका हुन् । मंगलबार सदरमुकाम म्याङलुङमा राहत संकलन सुरु गरेको दैवी प्रकोप उद्दार समितिका संयोजक तथा प्रमुख जिल्ला अधिकारी उमेशकुमार ढकालले बताए ।

म्याङलुङमा पनि दमकलकै चिन्ता

छिमेकी जिल्ला ताप्लेजुङ्गमा आगलागी हुँदा त्यतिका धेरै धनजनको क्षति भएको भन्दै यस्तो हुन नदिन म्याङलुङ्ग बजारका टोलटोलमा पुगेर प्रजिअ ढकालले आगोबाट बच्न आग्रह गरेका छन् ।

पटक-पटक आगलागीको पीडा भोगिरहेका तेह्रथुमे जनता समेत दमकल नहुँदा ताप्लेजुङमा आएको विपत्ति फेरि तेह्रथुममा पनि नआउँला भनेर ढुक्क हुन सकेका छैनन् स्थानीयवासीहरु ।

म्याङलुङमा विभिन्न समयमा भएको आगलागीले क्षतविक्षत भएको पीडा नसकिँदै ताप्लेजुङ्गमा भएको आगलागीले जिल्लाबासी उद्योगी व्यवसायी झस्किएकोे उद्योग वाणिज्य संघका अध्यक्ष महेन्द्र काफ्लेले बताए ।

आगो निभाउन पर्याप्त पानी र दमकल नभएर त्यतिका क्षति भए पनि अझैसम्म पानी र दमकलको व्यवस्था गरिएको छैन ।

त्राषदिपूर्ण कालो रात

सोमबार राति ६:४० बजे एउटा होटलबाट सल्किएको आगो १० बजेमात्रै नियन्त्रणमा आएको थियो । जिल्लामा दमकल नभएकाले स्थानीयवासी र सुरक्षाकर्मीले केहीे घरहरु भत्काएर क्षति कम गर्ने प्रयास गरेका थिए ।

आगलागीबाट घर बास खरानी भएपछि सदरमुकामका करिब १२० परिवारको बिचल्ली भएको छ । मंगलबार दिउँसो कतिपय पीडितहरु आफ्नो घर रहेको ठाउँमा खरानी उधिनीरहेका थिए भने कोही टोलाइरहेका देखिन्थे । (आगलागीपछिको दृश्य यहाँ हेर्नुहोस्)

जिल्लामा यसअघि नै आगलागीबारे सतर्कता अपनाउने र दमकलको व्यवस्था गर्ने भनिए पनि सरकारी पक्षबाट गैरजिम्मेवारी प्रकट गरिँदा क्षति बढी भएको गुनासो स्थानीयको छ । (थप समाचार र तस्वीरका लागि यहाँ क्लिक गर्नुहोस्)

गृहमन्त्री गौतम फुङलिङ पुगेका बेला भेला भएका अग्निपीडित

राहत एवं थातबासको प्रयास

आगलागीमा घर र सम्पत्ति गुमाएपछि सहाराविहीन भएकाहरुलाई मंगलबार पाथीभरादेवी मन्दिर संरक्षण तथा सम्वर्द्धन समित र वाणिज्य महासंघको पहलमा राहत बाँडिएको छ ।

(यो पनि पढ्नुहोस् : पीडितहरू जिविस, उद्योग वाणिज्य संघ र सामुदायिक भवनमा)

महासंघको पहलमा भएको राहात वितरण कार्यक्रमा मंगलबार १ सय ३० परिवारलाई चामल, दाल, नुन, तेल, पानीलगायत खाद्य पदार्थ संकलन गरेर बाँडिएको छ । ताप्लेजुङ रेडक्रसले कम्मल, पाल भाँडाकुँडा बाल्टिन लगायतका समानहरु बाँडेको छ ।

सामान चोरिएको गुनासो

यसैवीच पीडितहरुले आगलागीको भएको समयमा पसलहरुबाट सामान निकाल्ने क्रममा चोरी भएको गुनासो गरेका छन् ।

समानहरु सुरक्षित स्थानमा लाने भन्दै खराब नियतका मानिसले चोरेर लैजाँदा पीडितलाई पीडामाथि पीडा थप्ने कार्य भएको अध्यक्ष घिमिरेले गुनासो गरे ।

ताप्लेजुङको आगलागीमा प्रारम्भिक अनुमानअनुसार करीब ५० करोड क्षति भएको छ । ताप्लेजुङ उद्योग बाणिज्य संघका अध्यक्ष तारानाथ घिमिरेका अनुसार क्षति यो भन्दा बढी हुन सक्ने अनुमान गरिएको छ ।

प्रधानमन्त्रीले दु:ख व्यक्त गरे

यसैवीच प्रधानमन्त्री सुशील कोइरालाले अग्निपीडितहरुप्रति वक्तव्यमार्फत् सहानुभूति प्रकट गरेका छन् । प्रधानमन्त्रीले पीडितलाई शीघ्र राहत प्रदान गर्न निर्देशनसमेत दिएका छन् ।