१७ जेठ, काठमाडौं । तस्वीरमा देखिएको छाप्रो दरबार हाइस्कुल हो । भूकम्प अघिसम्म रानीपोखरी नजिकैको भव्य महलमा टाँगिएको भानु मावि दरबार हाइस्कुलको बोर्ड अहिले यही टहरामा ल्याएर टाँगिएको छ । आइतबारदेखि यही टहरामै दरबार हाइस्कुल सञ्चालन हुन थालेको छ ।
बैशाख १२ गते आएको भूकम्पले दरबार हाइस्कुलमा क्षति पुर्याएपछि हाल त्यसलाई भत्काउन थालिएको छ ।
भूकम्पले महिनादिनसम्म अत्याएपछि आइतबारबाट भूकम्प प्रभावित क्षेत्रका विद्यालय सञ्चालनमा आउन थालेका छन् ।
तर, विद्यालय खुले पनि नियमित पढाइ चाहिँ भएन । विद्यार्थी र शिक्षक शिक्षिकाहरु मिलेर नाचगान गरे । कसैले ध्यान र योगासन गरे भने स-साना केटाकेटीहरु खेलमा रमाए ।
भूकम्पको ज्ञास भगाउन र विद्यार्थीलाई सहज वातावरणमा ल्याउन विद्यालयहरुले विद्यार्थीलाई नाच गान लगायत अतिरिक्त क्रियाकलापमा लगाएका हुन् ।
धेरै दिनपछि सामुहिक वातावरणमा सहभागी हुन पाएका विद्यार्थीहरुले खुशी र रमाइलो महसुस गर्न थालेका छन् । केही घण्टा विद्यालयमा बसेर विद्यार्थीहरु घर फर्केका छन् ।
भूकम्पपछि विद्यालय खुलेको पहिलो दिन राजधानीमा देखिएका केही दृश्य यस्ता छन् :