१० असार, काठमाडौं । नेपालमा विहीबारदेखि मनसुन सक्रिय भएको छ । गत शनिबारदेखि मनसुन सुरु भए पनि सक्रिय थिएन । जल तथा मौसम विज्ञान विभागका अनुसार देशैभर मनसुन सक्रिय भएकाले मध्य र पश्चिमी क्षेत्रमा भारी बर्षा हुने संभावना छ ।
‘देशभरको मौसममा अहिले बदली भैरहेको छ यो क्रम झरीको रुपमा पर्सीसम्म देशभरी रहन्छ,’ मौसमविद शान्ति कँडेलले भनिन् ।
विहीबार विहान काठमाडौंमा केहीबेर पानी परेको थियो । खराब मौसमका कारण त्रिभुवन अन्तराष्ट्रिय बिमानस्थलबाट हुने केही राष्ट्रिय उडान प्रभावित भएका थिए ।
सावधानी अपनाउन सुझाव
मौसमविदहरुले मनसुन सक्रिय भएकाले संभावित बाढी पहिरोको खतराबाट पूर्व सावधानी अपनाउन सुझाव दिएका छन् । मौसम विज्ञान विभागले मनसुन सक्रिय भएकाले केही दिनपछि ठूलो पानी पर्ने र भूकम्पले भूबनोट कमजोर भएका जिल्लाहरुमा जोखिम बढ्ने भन्दै सचेत रहन भनेको छ ।
गत वैशाख १२ को भूकम्पका कारण ४० जिल्ला प्रभावित भएका छन् । ति जिल्लाका जोखिमयुक्त बस्तीलाई मनसुन अघि नै सुरक्षित स्थानमा सार्नुपर्ने भए पनि ढिलाइ भएको छ ।
गोर्खा, धादिङ, नुवाकोट, रसुवा, काठमाडौं, ललितपुर, भक्तपुर, सिन्धुपाल्चोक, मकवानपुर, दोलखा, रामेछाप, ओखलढुंगा, काभ्रे, लम्जुङ लगायतका जिल्लाहरुमा भूकम्पले जमिन चिरा-चिरा परेका छन् ।
यसबर्ष कम पानी पर्ने
ढिला गरी मनुसन सक्रिय भए पनि यसबर्ष कम पानी पर्ने पूर्वानुमान गरिएको छ । ‘मनसुन अवधिभर १४ सय २२ मिलिमिटर पानी पर्नुलाई सामान्य मानिन्छ तर यसपाली त्यति पानी पर्दैन,’ मौसमविद कँडेलले भनिन् ।
प्रतिक्रिया 4