२९ भदौ, जनकपुर । जनकपुरमा स्थानीय प्रशासनले जारी गरेको कर्फ्यू आदेश फिर्ता लिएको छ । प्रशासनले मंगलबार बिहान साढे नौ बजेदेखि कर्फ्यू आदेश फिर्ता लिएको जनाएको छ ।
जनकपुरमा भएको हिंसात्मक घटनामा ज्यान गुमाएकाहरुको शव व्यवस्थापन गर्न तथा नेपाली हिन्दुहरुको पर्व तीजलाई मध्यनजर गर्दै जनकपुरमा जारी गरिएको अनिश्चितकालीन कर्फ्यू हटाइएको प्रशासनले जनाएको छ ।
धनुषाको जनकपुर क्षेत्रमा संयुक्त लोकतान्त्रिक मधेसी मोर्चाले गरेको प्रदर्शनका क्रममा शुक्रबार भएको झडपमा तीन जनाको मृत्यु भएको थियो भने ३२ जना घाइते भएका थिए ।
मोर्चाको प्रदर्शनलाई ध्यानमा राख्दै स्थानीय प्रशासनले शुक्रबार बिहान ६ बजेदेखि अनिश्चितकालीन कर्फ्यू आदेश जारी गरेको थियो ।
