९ असोज, काठमाडौं । इंग्लिस प्रिमियर लिग फुटबलमा म्यानचेष्टर सिटीले टोटनहृयामसँग लज्जास्पद हार व्यहोरेको छ ।
शनिबार भएको खेलमा सिटी टोटनहृयामसँग ४-१ सँग पराजित भएको छ । सुरुवातका पाँच खेल जितेको सिटीको यो लगातार दोस्रो हार हो । यसअघि वेष्ट हृयामसँग हार व्यहोरेको थियो ।
त्यसअघि च्याम्पियन्स लिगमा सिटी युभेन्टसँग पराजित भएको थियो ।
घरेलु मैदानमा एक गोलले पछि परेको टोटनहृयामले उत्कृष्ट पुनारागमन गरेको हो । सिटीले २५ औं मिनेटमा केभिन डि ब्रोएनको गोलबाट अग्रता लिएको थियो ।
तर, पहिलो हाफको अन्तिम मिनेटमा टोटनहृयामका एरिक डियरले बराबरी गोल गरे ।
दोस्रो हाफमा टोटनहृयामले उत्कृष्ट खेल प्रदर्शन गर्दै तीन गोल थपेको छ । ५० औं मिनेटमा टोबीले गोल गरे भने ६१ औं मिनेटमा हृयारी केनले गोल गरे ।
खेलको ७९ औं मिनेटमा लामेलाले गोल गरेपछि टोटनहृयाम ४-१ ले विजयी भएको छ ।
