१५ असोज, काठमाडौं । नेपालको आन्तरिक मामिलामा भारतीय हस्तक्षेपको विरोध गर्दै हजारौं युवाहरुले शुक्रबार राजधानीमा प्रदर्शन गरेका छन् ।
प्रदर्शनमा हातमा राष्ट्रिय झण्डा बोकेर सहभागी भएका थिए । सहभागीहरुले ‘पारवहन सुविधा हाम्रो हक हो, वैदेशिक हस्तक्षेप मान्दैनौं’ लेखिएको प्ले कार्ड बोकेका थिए ।
प्रगतिवादी चर्चित गायक रामेश, रायन र विद्यार्थी नेताहरुको समेत सहभागिता रहेको प्रदर्शनमा हजारौं युवाहरु सहभागी थिए । उनीहरुले भारतीय हस्तक्षेप र नाकाबन्दीको विरोधमा नाराबाजी गरेका छन् ।
पूर्वविद्यार्थी नेता र कलाकारहरुको ‘राष्ट्रिय स्वाधीनता अभियान’ को आहृवानमा भएको प्रदर्शन जीवन शर्माले ‘मधेसी, पहाडी, हिमाली हामी सबै नेपाली’ बोलको गीत गाएर सुरु गरेका थिए ।
प्रदर्शन पुरानो बसपार्क, भद्रकाली, सुन्धारा, न्यूरोड गेट हुँदै फेरि शान्तिबाटिकामा नै पुगेर सभामा परिणत भएको थियो । सभामा रामेश, रायन, कुन्ती मोक्तान, शम्भु राई राष्ट्रिय भावनाले ओतप्रोत गीतहरु गाएका थिए ।