१८ असोज, काठमाडौं । भारतले नाकाबन्दी खुलाउन मातहतका निकायलाई निर्देशन दिएको भनिए पनि सोमबारसम्म पनि आयात-निर्यात सहज हुन सकेको छैन ।
नेपालकै ठूलो वीरगञ्ज भन्सार नाका सोमबार पनि ठप्प छ । मधेसी मोर्चाका कार्यकर्ताहरुले धर्ना जारी राखेका छन् ।
विराटनगरको रानी भन्सार नाकाबाट सोमबार विहान तेल बोकेका २ ट्यांकरसहित ३१ वटा गाडी नेपाल भित्रिएका छन् । दुईवटा तेल ट्यांकर, ग्यासको एउटा बुलेट र फलफूल तथा तरकारी बोकेका गाडीहरु नेपाल भित्रिएको रानी भन्सार कार्यालयका प्रमुख कृष्णबहादुर बस्नेतले जानकारी दिए ।
आइतबारको तुलनामा सोमबार धेरै गाडीहरु नेपाल भित्रिने क्रममा रहेको बस्नेतले बताए । रानी भन्सारबाट आइतबार ७ वटा गाडी नेपाल भित्रिए पनि तेल बोकेको एउटा पनि गाडी आएको थिएन ।
रानी भन्सार नाकामा अवरोध गर्न बसेका मधेसी मोर्चाका कार्यकर्ताहरुलाई आइतबार प्रहरीले हटाएको थियो । सोमबार भने मोर्चाका कार्यकर्ताहरु भन्सार क्षेत्रमा देखिएका छैनन् । मोर्चाको आन्दोलनका कारण बिराटनगर भन्सार नाका यही असोज ६ गतेदेखि प्रभावित छ ।
यसैगरी भैरहवा भन्सार नाकाबाट सोमबार विहान १० बजेसम्म २ ट्रक खसीबोका र फलफूल रहेको एउटा पिकअप भ्यान नेपाल भित्रिएको छ । आइतबार राति १२९ गाडी नेपाल भित्रिएका थिए । त्यसमा तीन तेल ट्यांकर २ बुलेट ग्यास थिए ।
नेपालगञ्जको जमुनाहा नाकाबाट सोमबार बिहानसम्म एउटा पनि गाडी नेपाल नभित्रिएको भन्सार प्रमुख राजेन्द्र हमालले जानकारी दिए । नेपाल भित्रिने पर्खाइमा भारतीय भूमिमा डेढ सय गाडीहरु रोकिएका छन् ।
