२७ मंसिर, काठमाडौं । पेट्रोल पम्पहरुमा रिमोट चलाएर ठगी गर्ने चिप्स जोड्न मिलोमतो गरेको आरोपमा नेपाल सरकारका सहसचिव एवं गुणस्तर तथा नापतौल विभागका प्रमुख प्रमुख रामआधार साह पक्राउ गरेका छन् ।
उनी वातावरण मन्त्रालयका सहसचिव हुन् । नेपाल प्रहरीको अपराध महाशाखाको टोलीले उनलाई पक्राउ गरेको छ । साहलाई आइतबार साँझ गौशालाबाट पक्राउ गरिएको महाशाखा प्रमुख एसएसपी सर्वोन्द्र खनालले अनलनइनखबरलाई जानकारी दिए ।
साह चार वर्ष अघि विभागको क्षेत्रीय निर्देशक हुँदा नै पेट्रोल पम्पहरुमा डिजिटल प्रविधि सुरु भएको थियो । साहको मिलेमतोमा रिमोट चलाएर ठगी गर्ने चिप्स जडान सुरु भयो । यसका लागि भारतीय समूह संलग्न भएको पाइएको छ ।
भारतीय गिरोहलाई पक्राउ परेका छन् भने हालै मात्र अपराध महाशाखाले राजधानीका १७ पेट्रोल पम्पमा छापा मारेर त्यस्ता चिप्सहरु बरामद गरेको थियो ।
पक्राउ परेकाहरुको बयानकै आधारमा अपराध महाशाखाले आयल निगम थानकोट डिपो प्रमुख रविन शर्मालाई पक्राउ गरेको छ । लगतै प्रहरीको टोलीले साहलाई पक्राउ गरेको छ ।
स्रोतका अनुसार साहले पम्पहरुमा ठगी गर्ने चिप्स जडान गरेर मासिक असुली गर्ने गरेका थिए । उनले पहुँच हेरेर १२ देखि २५ हजार रुपैयाँसम्म लिने गरेका थिए ।
पैसा लिएपछि विभागको अनुगमनका क्रममा कारबाहीबाट जोगाउने र नमान्नेलाई अनुगमनका नाममा फसाउने गरेको आरोप छ ।
