१२ चैत, काठमाडौं । नेकपा क्रान्तिकारी माओवादीको केन्द्रीय समितिको बैठक शुक्रबार बस्दैछ । बैठकमा एकीकृत नेकपा माओवादीसँगको पार्टी एकताका विषयमा छलफल हुनेछ ।
पार्टी प्रवक्ता पम्फा भुसालले पार्टी एकताको विषय छिटो टुंगो लगाउने विषयमा छलफल केन्दि्रत हुने जानकारी दिइन् । उनका अनुसार बैठक राज्यसमितिको कार्यालय कुपण्डोलमा बिहान ११ बजे बोलाइएको छ ।
बैठकको सुरुमा पार्टी अध्यक्ष मोहन वैद्यले पार्टी एकताका लागि भएका प्रगतिबारे जानकारी गराउनेछन् । त्यसपछि केन्द्रीय सदस्यहरुबीच छलफल चलाउने र एकताको विषय टुंगो लगाउने प्रवक्ता भुसालले बताइन् ।
पार्टी एकताको विषयमा एमाओवादी अध्यक्ष प्रचण्ड र नेकपा क्रान्तिकारी माओवादीका अध्यक्ष वैद्यबीच पटक-पटक छलफल हुँदै आएको छ ।
बैठकमा अध्यक्ष मोहन वैद्य र पूर्वमहासचिव रामबहादुर थापा बादलका अलग-अलग प्रस्ताव पेस हुने चर्चा छ । प्रस्तावहरु अलग भए पनि दुबैको जोड एमाओवादीसँग पार्टी एकता गर्नुपर्ने पक्षमा रहेको स्रोतले जनाएको छ ।
यसअघि एमाओवादीसँग एकताको विषयमा वैद्य र बादलबीच विवाद रहेको सार्बजनिक भएपछि बादलले पत्रकार सम्मेलन गरी त्यसको खण्डन गरेका थिए ।
प्रतिक्रिया 4