२ वैशाख, दाङ । दाङको देउखुरी क्षेत्रमा अर्को आगलागीको घटना भएको छ । राजपुर गाविस वडा नं. ४ सिमलखुट्टीमा बिहीवार आगलागी हुँदा ७ वटा घरगोठ जलेर नष्ट भएको स्थानीय नरेन्द्र भण्डारीले जानकारी दिए ।
काजोल सामुदायिक वन उपभोक्ता समुहमा लागेको डढेलो दिउँसो पौने एक वजे वस्तीमा सोझिएको थियो । आगलागीमा परि राममायाँ घर्ती, निरज घर्ती, आशबहादुर घर्ती र ओविराम घर्तीको घर गोठ जलेर खरानी भएको छ । आगलागी वाट भएको क्षतिको विवरण आएको छैन ।
स्थानीय वासिन्दा, सामुदायिक वनका उपभोक्ता, प्रहरी लगायतको सक्रियतामा आगो नियन्त्रणको प्रयास भैरहेको छ । आगोमा जलेर ४० वटा वाख्रा समेत मरेको वताइएको छ ।
यस अघि चैत २९ गते गंगापरस्पुर गाविसको वडा नं. ८ र वडा नं. ६ खज्रौटा गाउँमा भीषण आगलागी हुँदा ५३ ब्यक्तिको ६६ घर, ४५ गोठ र १६ भान्साघर जलेर नष्ट भएका थिए ।
यस्तै चैत २८ गते राजपुरको खिड्की नाकामा आगो लाग्दा १२ घर गोठ जलेर खरानी भएको थियो । फागुन ६ गते राजपुर गाविस वडा नंं १ फोहरा गाउँमा आगलागीमा परेर ५ घर परिवार पूर्णरुपमा विस्थापित भएका थिए ।
