२१ जेठ, काठमाडौं । बार्सिलोनाका स्टार फुटबलर लिओनल मेस्सी अदालतमा उपस्थित भएका छन् र आफ्ना पिता र कानुन व्यवसायीमाथि विश्वास रहेको बताएका छन् ।
मेस्सी र उनका बाबु जोर्जेमाथि कर छलीको आरोप लागेको छ । र, बार्सिलोनाको अदालतमा सुनुवाइ भइरहेको छ ।
अदालतमा बयान दिँदै मेस्सीले आर्थिक विषयमा आफूलाई केही थाहा नभएको बताए । आफू फुटबलमा केन्दि्रत भएको भन्दै उनले भने, म आफ्नो बुबा र कानुन व्यवसायीहरुलाई विश्वास गर्छु ।’
उनले आफ्नो बुबा र कानुन व्यवसायीहरुले कुनै सम्झौता हुँदा केही नभनेको र आफूले पनि केही नसोधेको बताए । उनले भने, उनीहरुले जहाँ भन्छन्, मैले त्यही हस्ताक्षर गरेँ ।
उनले अगाडि भने, मैले मेरो बुबालाई विश्वास गर्छु । उहाँले धोका दिनुहुन्छ भनेर कहिल्यै सोचेको छैन ।’
आफ्ना पिता र कानुन व्यवसायीहरुले कानुन उल्लंघन हुँदैछ भन्ने कुनै संकेत समेत नदिएको उनले बताए ।
अदालतमा मेस्सीका बुबा जोर्जेले पनि बयान दिए । स्पेनको कानुन र चिनियाँ भाषा आफ्नो लागि उस्तै भएको उनले बताए । उनले भने, मलाई यो कानुनबारे केही थाहा छैन । मेरो सामू केही प्रस्तुत हुँदा हुन्छ र हुन्न मात्र भन्छु ।’
आफ्नो लक्ष्य छोराको जीवन सहज बनाउने र उनलाई फुटबलमा केन्द्रित हुन दिन मात्र भएको उनले बताए । उनले आफूहरुलाई कानुनी र अकाउन्टिङ सहयोग आवश्यक रहेको मेस्सीका बुबाले बताएका छन् ।
