२१ असार, काठमाडौं । आपूर्ति मन्त्रालयको अनुगमन टोलीलाई आक्रमण गर्ने बल्खु तरकारी बजारका व्यापारीहरुले माफी मागेका छन् । अनुगमन टोलीले मापदण्ड विपरितका ढक, तराजु प्रयोग गर्ने तरकारी पसलहरुमा सिलबन्दी पनि गरेको छ ।
छड्के अनुगमन टोलीलाई बल्खुको थोक तथा तरकारी बजारका व्यापारीहरुले पानीको बोतलले आक्रमण गरेका थिए । तनावको स्थिति सिर्जना भएपछि उल्लेख्य संख्यामा प्रहरी टोली परिचालन गरिएको थियो ।
त्यसपछि भएको वार्तामा व्यापारीहरुले नापतौल बिभागबाट ढक तराजु प्रमाणित गराउन तीन दिनको समय माग गरेका थिए । अनुगमन टोलीले मापदण्ड पूरा नगरेका पसलहरुमा सिलबन्दी गरेको आपूर्ति मन्त्री गणेशमान पुनका स्वकीय सचिव अर्जुन पाठकले जानकारी दिए ।
कालिमाटीको तरकारी प्रयोगशालामा
मन्त्री पुन बल्खुको फलफूल बजारमात्र अनुगमन गरी कालीमाटी तरकारी बजारको अनुगमनमा गएका थिए । अरु सरकारी अधिकारीहरुको टोली बल्खुको तरकारी बजार अनुगमनमा गएको थियो । उनीहरुमाथि व्यापारीहरुले आक्रमण गरेका थिए ।
मन्त्री पुनका अनुसार कालीमाटी तरकारी बजारमा एउटा तराजुमा मात्रै कैफियत भेटिएको छ र त्यसलाई जफत गरिएको छ ।
मन्त्री पुनले अनलाइनखबरसँग भने, ‘कालिमाटीमा फोहोर र व्यवस्थापनको अलि समस्या देखियो, नत्र अरु सामान्य नै छ । एउटामामात्र कैफियत देखिएकाले जफत गरेका छौं ।’
उनले तरकारीमा विषादीको मात्रा छ कि छैन भनेर केही नमूना संकलन गरी परीक्षण गर्न पठाइएको छ ।
