६ साउन, काठमाडौं । आज घोषणा हुने पल्सर स्पोर्टस अवार्ड अन्तर्गत गत बर्ष उत्कृष्ट प्रदर्शन गरेको नेपाली राष्ट्रिय फुटबल टोलीलाई टिम अफ द इयरको उपाधिबाट सम्मान गरिने भएको छ ।
आयोजक नेपाल खेलकुद पत्रकार मञ्चका अध्यक्ष महेश आचार्यले गत बर्ष गरेको उत्कृष्ट प्रदर्शनको आधारमा नेपाली टोलीलाई टिम अफ द इयरको उपाधिबाट छुट्टै सम्मान गर्न लागिएको जानकारी दिए ।
गत बर्ष लामो समयपछि नेपाली फुटबल टोलीले दुई उपाधि जितेको थियो । २३ बर्षपछि नेपाली फुटबलमा उपाधिको खडेरी तोड्दै दुई उपाधि भित्र्याएको नेपाली टोलीलाई सम्मानस्वरुप टिम अफ द इयरको उपाधिबाट सम्मान गर्न लागिएको हो ।
नेपाली टोलीले बंगलादेशको बंगबन्धु गोल्डकप र भारतमा भएको १२औं सागमा फुटबलबाट स्वर्ण जितेको थियो ।
अवार्डका चार बिधामा पनि फुटबलका ५ खेलाडी तथा प्रशिक्षक मनोनयनमा परेका छन् ।
यसअघिको संस्करणमा नेपाली क्रिकेट टिमले यस्तो सम्मान पाएको थियो । जतिबेला नेपाली क्रिकेटले ऐतिहासिक प्रदर्शन गर्दै ट्वान्टी ट्वान्टी बिश्वकपमा सहभागीता जनाएको थियो ।
