१३ साउन, बनेपा । भूकम्पबाट क्षतिग्रस्त घर पुनःनिर्माणका लागि सम्झौता गरेका भूकम्पपीडितले पहिलो किस्ताको रकम पाउन विभिन्न बैंकमा धमाधम खाता खोल्न थालेका छन् ।
जिल्लामा सबैभन्दा पहिले अनुदान सम्झौता गरेको रविओपी गाविसमा जिल्ला विकास समितिले पठाएको रु ० हजार प्राप्त गर्नका लागि राष्ट्रिय वाणिज्य बैंक बनेपा शाखामा खाता खोल्ने काम जारी रहेको गाविस सचिव छविलाल श्रेष्ठले जानकारी दिए ।
“अबको केही दिनमा नै खाता खोल्ने काम सकिन्छ, त्यसपछि पीडितले पहिलो किस्ताको रकम पाउनुहुन्छ,” उनले भने। रविओपी गाविसमा अनुदान सम्झौता गरेका ८१५ जनामध्ये ७८४ जनाले सम्झौताबमोजिम पहिलो किस्ताको रकम पाउँदै छन् ।
त्यस्तै कोसीपारीको गाविस कोलाँतीभुम्लुमा २६७ र कोसीदेखा गाविसमा ६९ सहित कुल एक हजार १२० जनाले पहिलो किस्ताको ५० हजार रकम पाएको राष्ट्रिय पुनःनिर्माण प्राधिकरण उपक्षेत्रीय कार्यालय धुलिखेलका डिभिजन इन्जिनियर होमनाथ पौडेलले जानकारी दिए । पहिलो किस्ताको रकम निकासा भएपछि घर निर्माणको प्रक्रिया अघि बढ्ने उल्लेख गर्दै वर्षाको समय कटेपछि घर निर्माण हुने उनले बताए ।
इन्जिनियर पौडेलले काभ्रेपलाञ्चोकको १८ गाविस र दुई नगरपालिकामा विभिन्न विवादका कारण पुनःनिर्माणका लागि सम्झौता हुन नसकेको जानकारी दिँदै पनौती नगरपालिकामा आगामी १७ गतेबाट नै अनुदान सम्झौता गर्ने निर्णय भएको छ । भदौको अन्तिम सम्ममा पुनःनिर्माणका लागि सबै ठाउँको सम्झौताको काम सकिने र लगत्तै रकम वितरण हुने उहाँले बताए ।
राष्ट्रिय पुनःनिर्माण प्राधिकरण उपक्षेत्रीय कार्यालय धुलिखेलले दिएको तथ्याङ्कअनुसार जिल्लामा ६७ हजार ६६५ जना भूकम्पपीडित रहेका छन् । तीमध्ये १९ हजार १२५ जनासँग पुनःनिर्माणका लागि सम्झौता भइसकेको छ भने नौ हजार ६४ जनाले आफूहरुको नाम छुटेको भन्दै गुनासो गरेका छन् ।