कुनै यस्तै हिउँदको रात
तिमी मकलभरि आगोको रापमा सेकिएर
मस्त मधुशालामा डुब्दै गर्दा
मेरी सुत्केरी हजुरआमा – चिसोको स्याँठले डामिँदै
सराप्दै थिइन् प्रकृतिका देवतालाई ।
तिम्रा जीबा बडा हाकिममा बढोत्तरी हुँदै गर्दा
मेरा जीबा औलोसँग लडाइँ गर्दै
फाँड्दै थिए खोरिया
तिम्रो लालपुर्जामा सुदूर क्षितिजसम्म फैलिएको
त्यो जिम्मावाल भूमि
तिनकै उम्दा श्रमले सम्याइएका हुन् ।
चिर्दै सम्याउँदै यो धरतीको छाती
मेरा हजुरबाले जवानीका उम्दा रङ यही माटोमा मिसाए ।
चलाउँदा चलाउँदै फरुवा र बेल्चा
मेरा बौवाको शिरको मैलो फेटा
यहीँ कतै खसेको हो ।
अनवरत घुमिरहेकै थियो समय
फेरिरहेकै थियो तिमी र तिम्रा मुखौटाहरु
तर कहिल्यै फेरिएनन् हाम्रा फरुवामा नयाँ बिँड ।
कहिल्यै भरिएनन् हाम्रा रित्तो सपनाको भकारी ।
कसम से, खाली भकारीको माथि सुत्दा
आफ्नै जन्नीलाई एक झ्वाँक प्रेमले अङ्गालूँ – त्यो पनि आँट पुगेन कहिल्यै ।
काठमाडौं !
मैले गैंती नउचालेको भए
बग्दैन थिए यी नहर र कुलामा पानी
मेरी जन्नीले फरुवा नउठाएको भए
झुल्दैनथे यी फाँटभरि धानका बाला ।
तिमी त मात्र फर्मान जारी गर्छौ काठमाडौं बसेर
कि यसपालीको धानमा फल्नु हुन्न भुस ।
तिमी त शंका मात्र गरिरहन्छौ
कि मैले फलाएको बास्मती चामलमा
यो वर्ष किन कम छ सुगन्ध ?
कि मैले पठाएको दालको रङ किन घुर्मैलो ?
तिम्रो आशंका चामल र दालको रङमा हो कि
मेरो अनुहारको रङमा ?
मेरो मिहिनेत र पसिनामा हो कि
मेरो नागरिकतामा ?
सार्दै-सार्दै दसगजाको ढुङ्गो
कोही पस्यो भने तोरीबारी फाँड्न
हात मोल्दै बस्नु, त्यो तिम्रो कमजोरी हो ।
म त गरिरहेकै छु रखवारी यो देशको
पिएर यही धराको पानी
काठमाडौं !
यसरी मेरा पसिना र मेरी जन्नीको रजले सिञ्चित यो जमिनमा
कसरी हुन सक्यो तिम्रो मात्र एकाधिकार ?
म त भूमिपुत्र हुँ
यो माटोसँग मिल्छ मेरो अनुहारको रङ ।
यहाँको हावासँग घुल्छ मेरो श्वास ।
मेरो पसिनाले बढेका हुन् यी नदीको बहाव ।
मेरो रगतको रङ बोकेर फुलेका छन्
डाँडामाथि रातो गुराँस ।
काठमाडौं !
भन त, अब कसरी पखाल्छौ तिमी
माटोबाट मेरो अनुहारसँग
र मलाई गर्छौ देशविहीन ?
मलाई थाहा छ, तिम्रो झेली अनुहारमा
परिवर्तनका कुनै नयाँ लहरहरु कुद्ने छैनन् ।
तिम्रो कागजी किताबमा
मेरा लागि कुनै नयाँ सपनाहरु कोरिने छैनन् ।
त्यसै र त दसगजामा उभिएर
ललकारिरहेछु तिम्रो एकात्मक अस्तित्व ।
ए राजधानी,
तिमीले बाध्य पार्यो र उठाएँ आज
अस्तित्वको झण्डा
यी चर्का आवाजहरु तब मात्र रोकिएलान्
यी इन्क्लाबी हातहरु तब मात्र थामिएलान्
जब लेखिनेछन् – मेरो हुलिया, मेरो नाम
मेरो इतिहास र मेरो पसिनाको रङ
यो देशको बहीखातामा ।
प्रतिक्रिया 4