जुन दिन भन्यौ आफ्नोपनको अवधि सकियो
त्यही दिन मेरो यो धडकनको अवधि सकियो ।
जूनतारा आजभोलि खेलौना लाग्दैनन्,
लाग्छ अबदेखि बचपनको अवधि सकियो ।
टाउकोभन्दा माथि हात उठाउँछ मान्छे,
सायद शिर झुकाउने चलनको अवधि सकियो ।
रुपियाँ-पैसा जस्तै देख्छु सबैको अनुहार यहाँ,
मलाई लाग्छ दुनियाँमा धनको अवधि सकियो ।
समयले झारिदिएको छ सबै सपनाका दाँतहरु,
फिर्ता लैजाऊ तिम्रो यो मञ्जनको अवधि सकियो ।
