९ माघ, काठमाडौं । ब्राजिलियन क्लब चापेकोइन्सले आफ्नो टिमका अधिकांश खेलाडीको ज्यान जाने गरी भएको विमान दुर्घटनापछि पहिलो खेल खेलेको छ । कोलम्बियामा २९ नोभेम्बरमा भएको दुर्घटनामा चापेकोइन्सका १९ खेलाडी र स्टाफसहित विमानमा सवार ७१ जनाको मृत्यु भएको छ ।
दुर्घटनापछि चापेकोइन्सले २२ नयाँ खेलाडी अनुवन्ध गरेको छ र बि्रजिलियन च्याम्पियन पल्मिरेससँग शनिबार मैत्रिपूर्ण खेल खेलेको छ । पाचेकोइन्सले नयाँ जीवन सुरु गर्नुअघि विमान दुर्घटनामा बाँचेका तीन खेलाडीलाई खेल अघि कोपा सुडामेरिकानाको उपाधि दिइएको थियो ।
डिफेण्डर नेटो र एलन रुसेल र गोलकिपर फलम्यान दुर्घटनामा बाँचेका थिए । उनीहरुले पीडित परिवारका सदस्यसँगै २० हजार समर्थकका अगाडि उपाधि उचाले । विमान दुर्घटनामा बाँचेका ६ जना मध्ये रिपोर्टर राफेल हेनजेल भने कमेन्टेटर थिए । यो खेलका लागि मात्र विश्वभरका २४१ पत्रकारले एक्रिडेसन पाएका थिए ।
खेल ७१ मिनेटमा रोकियो र दुबै टिमका सदस्यका साथै समर्थकले पीडितहरुको सम्मानमा ताली बजाए ।
मैत्रिपूर्ण खेलमा चापेकोइन्सले पल्मिरेससँग २-२ को बराबरी खेलेको छ ।
