२९ फागुन, काठमाडौं । यातायात ब्यवस्था विभागमा ५४ हजार नयाँ स्मार्ट लाइसेन्स अइपुगको छ । झण्डै ६० हजार चालक ट्रायल पास गरेर प्रतिक्षामा रहेका बेला ५४ हजार स्मार्ट लाइसेन्स आइपुगेको हो ।
विभागले अहिले काठमाडौंमा वितरण गरिरहेको स्मार्ट लाइसेन्स सकिएको छ । स्मार्ट लाइसेन्स सकिादा पनि विभागले छपाइका लागि टेण्डर गरेको थिएन । सकिएर अभाव नै भएपछि भारतको मद्रास प्रिन्टर्सले विना टेण्डर नै ५४ हजार लाइसेन्स छाप्न अनुमति पाएको थियो ।
प्रिन्टर्सले पठाएको स्मार्ट लाइसेन्स विभाग आएर वितरण थालिएको प्रवक्ता डा. टोकराज पाण्डेले अनलाइनखबरलाई जानकारी दिए । उनले यो लाइसेन्सको अबको २ महिनाको माग धान्ने दावी गर्दै उनले स्मार्ट लाइसेन्स वितरणमा अहिले कुनै समस्या नरहेको बताए ।
‘हामी तत्काल स्मार्ट लाइसेन्सका लागि टेण्डर गर्दैछौं’ पाण्डेले भने,‘लाइसेन्सको वितरण्मा कुनै समस्या आउन नदिने द्रुतगतिमा टेण्डर गर्ने तयारी छ ।’
सुरुवातमा ३ महिनाभित्रै काठमाडौं बाहिरबाटै स्मार्ट लाइसेन्सको वितरण थाल्ने विभागको दाबी थियो । तर, १४ महिना बित्दा पनि उपत्यकाबाहिर स्मार्ट लाइसेन्स बाँड्नु त परै जाओस्, काठमाडौंमै वितरण रोकिएको छ ।
प्रिन्ट नभएका स्मार्ट लाइसेन्स सकिन थालेपछि यातायात व्यवस्था विभागले समय-समयमा विभिन्न बहाना बनाउँदै काठमाडौंमा लाइसेन्सको वितरण रोकिरहेको थियो ।
बेलैमा टेण्डर गरेको भए अहिले उपत्यकाबाहिर पनि वितरण सुरु भइसक्थ्यो ।
