६ बैशाख, चितवन । राष्ट्रिय प्रजातन्त्र पार्टीका अध्यक्ष कमल थापाले राप्रपाले जित्ने स्थानीय तहमा संगठित धर्म परिवर्तन गराउने कामलाई निस्तेज पार्ने दावी गरेका छन् ।
चितवनको भरतपुरमा राप्रपा चितवनले गरेको जनसभालाई सम्वोधन गर्दै थापाले लोभलालसा, दवाव र प्रभावमा देशमा भैरहेको धर्मपरिवर्तनलाई रोक्ने अभियान राप्रपाले जित्ने स्थानीय तहबाट शुरु गर्ने बताए ।
‘कांग्रेस, एमाले र माओवादीबाट वाक्क भएका जनताका लागि राप्रपा बैकल्पिक राजनीतिक शक्तिका रुपमा आएको छ,’ अध्यक्ष थापाले भने, ‘ठूला दलका कारण देशमा संकट गहिरिएकोले राप्रपाले संकटको निकास दिन्छ ।’
अध्यक्ष थापाले निर्वाचन बहिष्कार गर्ने निर्णय गरेका मधेस केन्दि्रत दललाई त्यस्तो गल्ती नगर्न सुझाव दिए । थापाले मधेसी मोर्चाको माग सम्बोधनका लागि सरकारले संविधान संशोधन विधेयक संसदमा दर्ता गरिसकेको भन्दै चुनाब बहिष्कारको निर्णय फिर्ता लिन आग्रह गरे ।
थापाले हिमाल, पहाड, तराई मधेसका कोही पनि नेपाली जनतालाई भोट हाल्नबाट बञ्चिन हुन नहुने भन्दै निर्वाचनमा सबै दलको सहभागिता सुनिश्चित हुनुपर्ने बताए ।
नेता थापाले नयाँ नेपाल बनाउने बाटो गलत भएका कारण अहिले देश गम्भीर मोडमा पुगेको टिप्पणी गरे ।
यो पनि पढ्नुहोस्
