२१ बैशाख, काठमाडौं । ललितपुर उपमहानगरपालिकामा नेपाली कांग्रेस र माओवादी केन्द्रवीचको तालमेलको प्रयास असफल भएको छ ।
विहीबार अपरान्हसम्म पनि तालमेलको प्रयास गर्दा पनि सहमति नभएपछि ललितपुर उपमहानगरमा कांग्रेस र माओवादी एक्लाएक्लै चुनावमा भिड्ने भएका छन् ।
काठमाडौं, पोखरा र भरतपुरसमेत तीनवटा महानगरपालिकामा केन्द्रीय स्तरबाटै कांग्रेस र माओवादीवीच तालमेल गर्ने सहमति भएको छ ।
काठमाडौं र पोखरामा माओवादीले कांग्रेसलाई मेयरमा सघाउने र भरतपुरमा कांग्रेसले माओवादीलाई मेयरमा सहयोग गर्ने गरी तालमेल भएको हो ।
सहमतिअनुसार पोखराबाट माओवादी मेयरका उम्मेदवार विश्वप्रकाश लामिछाने र भरतपुरबाट कांग्रेसका मेयर उम्मेदवार दिनेश कोइरालाले उम्मेदवारी फिर्ता लिएका छन् । भरतपुरको उपमेयरका प्रत्यासी सुरेन्द्र गुरुङले पनि उम्मेदवारी फिर्ता लिएका छन् ।
