२० जेठ, काठमाडौं । व्यवस्थापिका संसद सचिवालयले बहुमतीय प्रक्रियाबाट प्रधानमन्त्री निर्वाचनको कार्यतालिका प्रकाशन गरेको विषयलाई आजका पत्रपत्रिकाहरुले प्राथमिकताका साथ छापेका छन् । पत्रिपत्रिकाहरुले कार्यतालिका अनुसार प्रधानमन्त्री चयनका लागि शनिबार मनोनयन हुने उल्लेख गर्दै कांग्रेस–माओवादी गठबन्धनको उम्मेदवार देउवा हुने लेखेका छन् । एमालेका सम्भावित प्रधानमन्त्री उम्मेदवार वामदेव गौतम भएको पत्रपत्रिकाले लेखेका छन् ।
आन्तरिक राजस्व विभागका महानिर्देशक चूडामणि शर्मा पक्राउ परेको खबरलाई पनि पत्रपत्रिकाहरुले पहिलो पृष्ठमा स्थान दिएर छापेका छन् ।
प्रधानमन्त्री चुनावको कार्यतालिका प्रकाशन भएको विषयलाई गोरखापत्र दैनिकले मुख्य समाचार बनाएर छापेको छ । गोरखापत्रमा आन्तरिक राजस्व विभागका महानिर्देशक चूडामणि शर्मा पक्राउ परेकोदेखि पहिलो स्थानीय तह निर्वाचनबाट ३८ प्रतिशत महिला जनप्रतिनिधि चुनिएको सम्मका खबर छन् ।
अन्नपूर्णले पनि प्रधानमन्त्री चयन प्रक्रियाको विषयलाई नै मुख्य खबर बनाएर लेखेको छ ।
जिल्ला समन्वय समिति निर्वाचनलाई मुख्य खबर बनाएर छापेको नयाँ पत्रिका दैनिकले धेरै दलको समर्थन जुटाउने प्रयासमा कांग्रेस सभापति शेरबहादुर देउवा लागेको लेखेको छ ।
नागरिक दैनिकले मधेसका नागरिक मतदान गर्न आतुर रहेको सामग्रीलाई प्राथमिकताका साथ छापेको छ । नागरिकले घरमै रहेका प्रहरीका पूर्व तीन महानिरीक्षक अझै पक्राउ नपरेको जनाएको छ ।
कान्तिपुरले चूडामणि शर्मा पक्राउ र निर्वाचन प्रक्रियाबारे लेखेको छ ।
प्रतिक्रिया 4