२ असार, काठमाडौं । मनाङको नेस्याङ– १ स्थित चामे–मनाड सडकखण्डमा बिहीबार भएको जीप दुर्घटनामा २ जनाको ज्यान गएको छ भने ९ जना घाइते भएका छन् ।
मनाडबाट चामे आउँदै गरेको ग१ज ६६०२ नम्बरको जिप बिहीबार दिउँसो २ः३० बजे अनियन्त्रित भई सडकबाट ८ मिटर तल खस्दा नाल्मा–२ लमजुङका गोपी लामा र काक्रे–९, रुकुमका विक्रम गुरुङको ज्यान गएको हो । जिल्ला प्रहरी कार्यालय मनाङका अनुसार लामाको घटनास्थलमै र गुरुङको उपचारका क्रममा जिल्ला अस्पताल मनाङमा मृत्यु भएको हो ।
दुर्घटनामा १ मेक्सिकन नागरिकसहित ९ जना घाइते भएका छन् । घाइतेमध्ये केहीको अवस्था गम्भीर रहेको बताइएको छ । उनीहरुको विभिन्न अस्पतालमा उपचार भइरहेको प्रहरीले जनाएको छ ।
यात्रुवाहक जिप दुर्घटनाको कारण खुलेको छैन । प्रहरीले दुर्घटनाबारे अनुसन्धान भइरहेको जनाएको छ ।
