तातो चिया या कफी पिउनु किन खतरनाक हुन्छ ?

२५ भदौ, काठमाडौं । अक्सफोर्ड विश्वविद्यालयका अनुसन्धानकर्ताहरूले गरेको एक अध्ययन अनुसार धेरै तातो चिया वा कफीजस्ता पेय पदार्थ नियमित रूपमा पिउनाले फूड पाइपको क्यान्सर ( ‘इसोफेजियल क्यान्सर’ ) को जोखिम उल्लेख्य रूपमा बढ्ने पाइएको छ।

‘इन्टरनेसनल जर्नल अफ क्यान्सर’ मा प्रकाशित उक्त अनुसन्धानलाई यस क्षेत्रमा हालसम्मकै सबैभन्दा ठूलो अध्ययन मानिएको छ । जसमा करिब १० लाख पुरुष तथा महिलाहरूको तथ्याङ्क विश्लेषण गरिएको थियो।

अनुसन्धानका अनुसार ६५ डिग्री सेल्सियस वा सोभन्दा बढी तापमान भएका धेरै तातो पेय पदार्थ पिउने मानिसहरूमा गुनगुनु (मनतातो) पेय पदार्थ पिउनेहरूको तुलनामा फूड पाइपको क्यान्सर हुने जोखिम करिब तीन गुणा बढी हुन्छ।

दैनिक छ वा सोभन्दा बढी कप तातो पेय पदार्थ सेवन गर्नाले पनि यो जोखिम थप बढ्ने अध्ययनले देखाएको छ। वैज्ञानिकहरूका अनुसार धेरै तातो तरल पदार्थले फूड पाइपका भित्री कोशिकाहरू (सेल्स) लाई क्षति पुर्‍याउँछ । जसले गर्दा क्यान्सरको जोखिम सिर्जना हुन्छ।

अध्ययनकी प्रमुख अनुसन्धानकर्ता डा. केरेन पपीरका अनुसार दक्षिण अमेरिकामा पिइने ‘मेट’ नामक धेरै तातो हर्बल पेय पदार्थमाथि गरिएका अघिल्ला अनुसन्धानहरूले पनि यस्तै नतिजा देखाएका थिए। सामान्यतया केतलीमा पानी उम्लिँदा यसको तापमान १०० डिग्री सेल्सियस हुन्छ भने कपमा खन्याएपछि ९० देखि ९५ डिग्री सेल्सियससम्म पुग्छ।

तर, टेकअवे कफी वा चिया पिउँदा ४९ देखि ६० डिग्री सेल्सियसको तापमान उपयुक्त मानिन्छ। दूध मिसाउँदा पेय पदार्थ केही चिसिए पनि पिउनुअघि केही मिनेट पर्खनु नै स्वास्थ्यका लागि सुरक्षित हुने अनुसन्धानकर्ताहरूको सुझाव छ।

तथापि, विज्ञहरूका अनुसार यस्तो प्रकारको क्यान्सर (स्क्वामस सेल इसोफेजियल क्यान्सर) दुर्लभ मानिन्छ । आम मानिसमा यसको समग्र जोखिम निकै कम हुन्छ। अनुसन्धानकर्ताहरूका अनुसार धेरै तातो पेय पदार्थ खान छाड्ने हो भने फूड पाइपको क्यान्सरका १० मध्ये १ वा २ केसहरू नियन्त्रण गर्न सकिन्छ।

क्यान्सर रिसर्च युकेका अनुसार धेरै तातो पेय पदार्थभन्दा पनि धुम्रपान र अत्यधिक मध्यपान फूड पाइपको क्यान्सरका मुख्य कारक हुन्। त्यसैले धुमपान नगर्नु र रक्सीको सेवन घटाउनु नै यस क्यान्सरबाट बच्ने सबैभन्दा प्रभावकारी उपाय हो। छाती वा घाँटी दुख्नु, खाएको खाना निल्न गाह्रो हुनु, पेट पोल्नु र तौल घट्नु फूड पाइपको क्यान्सरका मुख्य लक्षणहरू हुन् ।