३ असोज, बारा । प्रदेश नम्बर २ को ३ उपमहानगरपालिका मध्ये बाराका दुई उपमहानगरमा कांग्रेस र एमालेबीच तीव्र प्रतिस्पर्धा देखिएको छ । कलैयामा कांग्रेसले र जितपुर सिमरा उपमहानगरमा एमाले उम्मेदवारले अग्रता लिएका छन् ।
मंगलबार अबेर सुरु भएको मत गणनाको पछिल्लो परिणाम अनुसार कलैया उपमहानगरमा कांग्रेस उम्मेदवार राजेशराय यादवले एमालेका मेयर पदका उम्मेदवार बिनोद साहलाई पछि पारेका छन् ।
दलका प्रतिनिधि र कर्मचारीको तालमेल नमिल्दा कलैया उपमहानगरको मत गणना अबेरदेखि सुरु भएको हो ।
यसैगरी जितपुरसिमरा उपमहानगरपालिकामा २ हजार २५० मत गणना हुँदा एमाले उम्मेदवार डा. कृष्ण पौडेल ८७५ मतले सबैभन्दा अगाडि छन् । उनलाई कांग्रेस उम्मेदवार कृष्णब्रत सिंहले ६०८ मतले पछ्याइरहेका छन् ।
त्यसैगरी माओवादी केन्द्रका उम्मेदवार राजन पौडेल ५६६ मतका साथ तेस्रो स्थानमा छन् ।
कडा सुरक्षाका बीच यी दुई उपमहानगरमा मत गणना जारी छ । सञ्चारकर्मीलाई समेत समाचार संकलनमा लागि मतगणना स्थलमा जान दिइएको छैन ।
