हिन्दी फिल्ममा एउटा गीतको लाइन छ, ‘गन्दा है, पर धन्दा है ।’ साँच्ची त्यो गन्हाउने धन्दामा कति फाइदा रहेछ भन्ने कुरा चाहिँ एउटा ट्वाइलेटको टेन्डरले खुलासा गरेको छ ।
भारतको मुम्बइस्थित छत्रपति शिवाजी महाराज टर्मिनल परिसरमा रहेको शौचालय सञ्चालनका लागि ८५ लाख भारुको टेन्डर परेको छ ।
सामान्यतया भारतमा एउटा रेल स्टेशनमा रहेका ट्वाइलेट सफा गर्नका लागि सफाइ कम्पनीहरुले अधिकतम ६–८ लाख भारुमा ठेक्का लिन्छन् । तर मुम्बइको उक्त रेल स्टेशनको ट्वाइलेट भने उल्टै ८५ लाख भारुमा ठेक्का लिइएको छ ।
वास्तवमा उक्त ट्वाइलेटलाई पहिलोपटक रिनोभेट, अपरेट, मेन्टेन एण्ड ट्रान्सफर अर्थात् आरओएमटी योजनाको रुपमा ठेक्कामा दिन लागिएको छ । यसो गर्दा ठेकेदारहरु शौचालयको सफाइमा बढि गम्भीर हुने ठम्याई सरकारी निकायको छ ।
अहिलेसम्म यो ट्वाइलेटमा ३ महिनामा ८ लाखका दरले ठेक्कामा दिने गरिएको छ । फेब्रुअरी देखि चाहिँ यसलाई ८५ लाखमा १० वर्षे ठेक्का दिइनेछ ।
साँच्ची रेल स्टेशनको गन्धको व्यापार अचाक्ली नै छ । मुम्बइको उक्त रेल स्टेशनमा दिनहुँ साढे २ लाख मानिस आवतजावत गर्छन् । प्रतिदिन ६५ देखि ७० हजार सम्मले ट्वाइलेट प्रयोग गर्दछन् । पिसावका लागि १ भारु, दिसाका लागि ५ भारु तथा नुहाउन १५ भारु लिँदा १० वर्षमा ठेकेदार कम्पनीले कति कमाउला ? आफै हिसाब गर्नुस् ।
एजेन्सीको सहयोगमा