१५ माघ, काठमाडौं । काठमाडौंको मिनभवनमा मोटरसाइकलको ठक्करबाट एक पैदलयात्रीको मृत्यु भएको छ । मृत्यु हुनेमा दोलखा सामाकोशी २ घर भई कोटेश्वर बस्दै आएका ५० वर्षीय ध्रुव कार्की छन् ।
कार्कीलाई मिनभवन क्याम्पस अगाडि मा बा ९० प ६०६४ नम्बरको मोटरसाइकलले गएराति ठक्कर दिएको थियो । उनको उपचारको क्रममा न्यूरो अस्पताल बाँसबारीमा मृत्यु भएको नयाँबानेश्वर प्रहरी प्रमुख डिएसपी रवि पौडेलले जानकारी दिए ।
कार्कीलाई सुरुमा ट्रमा सेन्टरमा उपचार गर्न लगिए पनि त्यहाँबाट न्यूरो अस्पताल बाँसबारी रिफर गरिएको थियो ।
डिएसपी पौडेलका अनुसार मोटरसाइकल चालक प्रहरी नियन्त्रणमा छन् र उनीमाथि आवश्यक कारवाही प्रक्रिया अघि बढिसकेको छ ।
मिनीट्रकको ठक्करबाट सल्यानमा दम्पतीको ज्यान गयो
यसैबीच, सल्यानमा आइतबार मिनी ट्रकले मोटरसाइकललाई ठक्कर दिँदा त्यसमा सवार दुई जनाको ज्यान गएको छ । रा १ ख ९३९ नम्बरको मिनीट्रकले रा ३ प ८५९६ नम्बरको मोटरसाइकललाई ठक्कर दिँदा घाइते दुईजनाको उपचारका क्रममा ज्यान गएको हो ।
ठक्करबाट ३२ वर्षीय दिलीप बुढा र ३० वर्षीया सम्झना बुढाको ज्यान गएको हो । प्रहरी चौकी कपुरकोटका अनुसार, मृतक दिलीप र सम्झना श्रीमान्–श्रीमती हुन् ।
ठक्करबाट गम्भीर घाइते भएका दुई जनालाई राप्ती अञ्चल अस्पताल, तुलसीपुरमा उपचारका लागि लगिएकोमा गएराति नै मृत्यु भएको हो ।
प्रहरीले ठक्कर दिने मिनीट्रक चालक तुल्सीराम घर्तीलाई नियन्त्रणमा लिएर घटनाबारे अनुसन्धान गरिरहेको जनाएको छ ।
प्रतिक्रिया 4