२९ माघ, जनकपुरधाम । प्रदेश २ का प्रदेश प्रमुख रत्नेश्वर लाल कायस्थले मुख्यमन्त्रीका लागि बहुमत जुटाएर आउन राजनीतिक दलहरुलाई आहृवान गरेका छन् ।
प्रदेश प्रमुख कायश्यले बहुमत जुटाएर फागुन ३ भित्र आउन दलहरुलाई आहृवान गरेका हुन् ।
प्रदेशसभामा कुनै पनि पार्टीको बहुमत नरहेकाले दुई वा सो भन्दा बढी दलको समर्थनमा बहुमत प्राप्त गरी आउन प्रदेश प्रमुखले आहृवान गरेका प्रदेश प्रमुखको कार्यालयका सचिव लावण्यकुमार ढकालले जनाएका छन् ।
प्रदेश २ को १०७ सदस्यीय प्रदेशसभामा कुनै एक दलको बहुमत छैन । तर, दुई ठूला दल संघीय समाजवादी फोरम र राजपाबीच संयुक्त सरकार बनाउने सहमति भएको छ ।
दुई पार्टीको सहमति अनुसार मुख्यमन्त्री फोरमले पाउनेछ । फोरमले संसदीय दलको नेतामा लालबाबु राउत चयन भइसकेका छन् । अब उनी मुख्यमन्त्री हुनेछन् ।
प्रमुख विपक्षी दल एमाले हुनेछ ।
