१ फागुन, काठमाडौं । नेकपा माओवादी केन्द्रले प्रतिनिधि सभाका लागि समानुपातिकतर्फका सांसदहरुको सूची निर्वाचन आयोगमा बुझाएको छ । माओवादीले पाएको १७ समानुपातिक सांसदहरुमध्ये १६ महिला र १ पुरुषको नामावली आयोगमा बुझाएको हो ।
माओवादी समानुपातिक सूचीमा परेका एकमात्र पुरुष सांसद हितराज पाण्डे हुन् ।
तर, माओवादीले बुझाएको सूचीमा समावेशी र प्राथमिकताक्रम नमिलेको भन्दै आयोगले सच्याएर पठाउन भनेको छ ।
माओवादी केन्द्रका प्रवक्ता पम्फा भुसालले आयोगको पत्रअनुसार काम भइरहेको जानकारी दिइन् ।
माओवादीले बुझाएको सूची यस्तो छ–
खसआर्य (महिला)- रेखा शर्मा, पूर्णाकुमारी सुवेदी, धर्मशिला चापागाईं र सीता पोखरेल
आदिवासी जनजाति (महिला)- जयपुरी घर्ती, शशी श्रेष्ठ, ओनसरी घर्ती, यशोदा गुरुङ सुवेदी र अमृता थापा
दलित (महिला)- अञ्जना विशंखे र दुर्गा विक
मधेसी (महिला)- इन्दु शर्मा र बोधमाया यादव
थारु (महिला)- रामकुमारी चौधरी
मुस्लिम (महिला)- शेष चाँदतारा
पिछडिएको क्षेत्र- सत्या पहाडी
पुरुष- हितराज पाण्डे
सूचीमा त्रुटी रहेको भन्दै आयोगद्वारा अस्वीकार
तर माओवादीले बुझाएको सूचीमा त्रुटी भेटिएको भन्दै आयोगले सच्याएर बुझाउन भनेको छ ।
माओवादीको प्रारम्भिक सूचीमा सत्या पहाडीको नाम खस आर्यको सूचीमा छ । तर सोमबार सूची बुझाउँदा पहाडीलाई पिछडिएको क्षेत्रमा राखेर बुझाइएको छ । आयोगले त्यसलाई अस्वीकार गर्दै सच्याउन भनेको छ ।
माओवादीको प्रारम्भिक सूचीमा जनमुक्ती पार्टीका नेता प्रेमबहादुर सिंहको नाम पिछडिएको क्षेत्रको पहिलो नम्बरमा छ । प्रेमबहादुर सिंह माओवादीको चुनाव चिन्ह लिएर निर्वाचन लडेका थिए ।
यसैगरी मधेसी समुदायबाट ३ जनाको नाम हुनुपर्नेमा २ जनाको मात्रै नाम माओवादीले बुझाएकाले त्यसलाई पनि सच्याउन निर्वाचन आयोगले भनेको छ ।
माओवादीको प्रारम्भिक बन्दसूचीमा मधेसी महिलाको पहिलो नम्बरमा इन्दु शर्मा, दोस्रो नम्बरमा बोधमाया यादव र तेस्रो नम्बरमा दिल कुमारीको नाम छ ।
यो पनि पढ्नुहोस्
आधाभन्दा बढी पुरानै अनुहार, आरक्षण कोटामा ब्यापारी र ठेकेदार
