११ वैशाख, काठमाडौं । साढे ३३ किलो सुनकाण्डमा संलग्नताको आशंकामा नेपाल प्रहरीले बहालवाला एसपी विकासराज खनालसँग आज बयान लिएर आन्तरिक हिरासतमा राखेको छ ।
खनाललाई गृह मन्त्रालयद्वारा गठित छानबिन समितिले मंगलबार गृह मन्त्रालयमा बयान लिएपछि नेपाल प्रहरीको एक नम्बर गणको हिरासतमा राखेको प्रहरी स्रोतले जानकारी दिएको छ ।
खनाल हाल मकवानपुर जिल्ला प्रहरी प्रमुख छन् । साढे ३३ किलो सुनकाण्डमा संलग्नताको आशंकामा नेपाल प्रहरीका पूर्वडीआइजी गोविन्द निरौला पक्राउ परिसकेका छन् ।
उक्त साढे ३३ किलो सुन त्रिभुवन विमानस्थलबाट बरामद हुँदा निरौला विमानस्थलको प्रहरी प्रमुख थिए भने खनाल पनि त्यहीँ कार्यरत थिए ।
सुनकाण्डको अनुसन्धानका लागि गृह मन्त्रालयद्वारा गठित छानबिन समितिले २३ जनालाई पक्राउ गरेर अनुसन्धान अघि बढाएको छ भने ३८ जनाको सम्पत्ति रोक्का गरेको छ । उक्त सुनकाण्डका भरिया सनम शाक्यको मोरङमा हत्या भएको थियो।
प्रतिक्रिया 4