२०७५ वैशाख १३ गते १९:४२ 
१३ वैशाख, काठमाडौं । बार्सिलोनाका फुटबल स्टार लियोनल मेस्सीले झण्डै ७ वर्षको कानुनी लडाइँपछि आफ्नै नामको ट्रेडमार्क पाएका छन् ।
युरोपियन अदालतको फैसलापछि अब खेल सामग्रीहरुमा मेस्सीले आफ्नै नामको टेडमार्क प्रयोग गर्न पाउने छन् । मेस्सीको नामको ट्रेडमार्कका लागि स्पेनिस साइकलिङ ब्राण्ड मास्सीले बखेडा झिकेको थियो । उस्तै नाम सुनिने हुँदा मेस्सीलाई ट्रेडमार्क दिन नहुने कम्पनीको भनाइ थियो ।
तर, अदालतले मेस्सी विश्व प्रख्यात फुटबलर भएकाले मास्सी ब्राण्डले भनेजस्तो कुनै भ्रम सिर्जना नहुने ठहर गरेको छ ।
फ्रान्सको एक फुटबल म्यागजिनले फुटबलबाट सर्वाधिक धेरै कमाउनेमा मेस्सीको नाम घोषणा गरेको एक दिनपछि अदालतको यस्तो निर्णय आएको हो । उक्त म्यागेजिनका अनुसार मेस्सीले १२६ मिलियन युरो कमाउँछन् ।
उनले फुटबलबाट सर्वाधिक कमाउने स्पेनिस क्लब रियल मड्रिडका क्रिष्टियानो रोनाल्डोलाई उछिनेका हुन् । रोनाल्डोले ९४ मिलियन युरो कमाउँछन् ।
मेस्सीले आफ्नै नामको ट्रेडमार्कका लागि सन् २०११ मा निवेदन दिएका थिए ।
प्रतिक्रिया 4