१४ वैशाख, काठमाडौं । एमाले अध्यक्ष एवं प्रधानमन्त्री केपी शर्मा ओली र माओवादी अध्यक्ष पुष्पकमल दाहाल प्रचण्डबीच झण्डै तीन घन्टा ‘वान अन वान’ वार्ता भएको छ ।
बालुवाटारमा भएको यो वार्ता सहमति हुन नसकेका विषय भन्दा ब्यानर विवादमै केन्दि्रत भएको छ ।
लेलिन जयन्तीको अवसरमा आयोजित संयुक्त कार्यक्रममा लेनिनको फोटो छुटेको भन्दै माओवादी कार्यकर्ताले विरोध गरेपछि दुई वटा ब्यानर राख्नु परेको थियो । बिहीबार एक कार्यक्रमा ओलीले ब्यानर विवादलाई केटाकेटी पनको संज्ञा दिए ।
स्रोतका अनुसार शुक्रबारको भेटमा माओवादी अध्यक्ष प्रचण्डले ओलीको अभिव्यक्तिमा आपत्ति जनाएका छन् । ‘ओलीले पनि ब्यानर विवादलाई निकै माइन्ड गरेका रहेछन्’ प्रचण्ड निकट स्रोतले भन्यो, ‘आज धेरै कुरा त्यसमै भएको छ ।’
दुई नेताबीच पार्टी एकता प्रक्रियामा सहमति हुन नसकेका विषयमा सामान्य छलफल मात्र भएको छ । तर, कुनै सहमति जुट्न सकेन र तत्काल अर्को भेट पनि तय भएको छैन । दुई नेताबीच २० गते भेटवार्ता गर्ने तयारी छ ।
यससँगै मे १ मजदुर दिवस र मे ५ मार्क्स जयन्तीमा एकता घोषणाको सम्भावना टरेको छ ।
दुई दलले मे १ मा एकता गर्ने घोषणा गरेका थिएनन् । तर, नेताहरुले मजदुर दिवसको अवसरमा एकता घोषणा गर्नु उपयुक्त हुने सुझाव नेताहरुलाई दिएका थिए ।
यसअघि वैशाख ९ मा एकता गर्ने सहमति नै भएको थियो । तर, विवादित विषयहरुमा दुई अध्यक्ष केपी ओली र प्रचण्डबीच सहमति नहुँदा प्रभावित भएको थियो ।
