२९ वैशाख, काठमाडौं । भारतीय प्रधानमन्त्री नरेन्द्र मोदी नेपाल भ्रमणमा रहेको दोस्रो दिन शनिबार पनि उपत्यकाको सवारी आवागमन केहीबेर प्रभावित हुने भएको छ ।
मोदीको सवारी रुटमा सवारी अवधिभर अन्य गाडीहरुलाई रोकिने छ र वैकल्पिक रुटको व्यवस्था गरिएको छ ।
मुक्तिनाथबाट त्रिभुवन अन्तर्राष्ट्रिय विमानस्थलमा करिब १० बजे मोदी ओर्लिनेछन् । त्यसपछि उनी पशुपतिनाथ मन्दिरमा पूजा गर्न जानेछन् ।
मोदी शनिबार बिहान मुक्तिनाथ दर्शन गर्न गएका थिए ।
एयरपोर्टबाट पशुपतिनाथ
सो समयमा विमानस्थल, तिलगंगा, बनकाली मोड, गौशाला चोक, भुबनेश्वरी चोक्सम्मको सवारी आवागमन प्रभावित हुने छ । मोदी पशुपतिनाथ मन्दिर परिसरको पश्चिम गेटसबाट भित्र प्रवेश गर्नेछन् ।
त्यसको लागि ट्राफिक प्रहरीले वैैकल्पिक मार्ग पनि तोकेको छ । त्रिभुवन विमानस्थलको मुख्य गेट, तिलगंगा, पशुपति भिजन, चार शिवालय चोक, बृद्धाश्रम मोड, पशुपतिनाथ परिसरको दक्षिण गेट हुँदै पशुपतिनाथ मन्दिरसम्मको सडकलाई विकल्पको रुपमा लिइएको छ ।
त्यो रुटमा बिहान साढे ८ बजेदेखि नै सुरक्षाकर्मी र ट्राफिक प्रहरीलाई ड्युटीमा खटाइएको छ ।
पशुपतिबाट हायात होटल
पशुपतिनाथ मन्दिरमा विशेष पूजा गरेपछि मोदी आफू बसेको होटल हायातमा जानेछन् । त्यहाँ जाँदा पशुपतिको पश्चिम गेट, भुवनेश्वरी चोक, गौशाला, मित्रपार्क, चाबहिल, चुच्चेपाटीको रुट प्रयोग हुनेछ ।
यसैगरी पशुपतिनाथको दक्षिण गेटबाट गौशाला, गौरीघाट, टुसाल हुँदै होटल हायात पुग्ने रुटलाई विकल्पको रुपमा राखिएको छ ।
हायातबाट राष्ट्रिय सभागृह
हायात होटलमा खानपिन र केहीबेर आराम गरेपछि मोदी राष्ट्रिय सभागृहमा नागरिक अभिन्दन समारोहमा सहभागी हुनेछन् । त्यसको लागि करिब २ः४५ को सवारी समय निर्धारण गरिएको छ ।
राष्ट्रिय सभागृहसम्म आउँदा चाबहिल, मित्रपार्क, गौशाला चोक, तिलगंगा एयरपोर्ट गेट, सिनामंगल, तिनकुने, नयाँबानेश्वर, बिजुलीबजार, माइतीघर, सिंहदरवार, पद्मोदय मोड, भृकुटीमण्डपको रुट प्रयोग हुनेछ ।
यसैगरी विकल्पको रुपमा चाबहिल, सुकेधारा, नारायणगोपाल चोक, शिक्षण अस्पताल, पानीपोखरी, ग्याङ्जोङ होटल, लैनचौर, केशरमहल, महेन्द्रशालिक, घण्टाघर, पुरानो बसपार्क हुँदै राष्ट्रियसभा गृहसम्मको रुटलाई राखिएको छ ।
राष्ट्रिय सभागृहबाट एयरपोर्ट
राष्ट्रियसभा गृहमा काठमाडौं महानगरपालिकाको तर्फबाट मोदीलाई नागरिक अभिनन्दन गर्ने र नगरको साँचो हस्तान्तरण गर्ने कार्यक्रम छ ।
त्यसपछि मोदी स्वदेश फिर्तीका लागि एयरपोर्टतर्फ प्रस्थान गर्नेछन् । उनी एयरपोर्ट प्रस्थान गर्नका लागि करिब पौने चार बजेको सवारी समय निर्धारण गरिएको छ ।
त्यसका लागि राष्ट्रिय सभागृहबाट भद्रकाली, सिंहदरवार, माइतीघर, बिजुलीबजार, नयाँबानेश्वर, तिनकुने, सिनामंगल, एयरपोर्ट गेट, गौचर ब्यारेक हुँदै मोदी विमानस्थलभित्र प्रवेश गर्नेछन् ।
यसको विकल्पको रुपमा भद्रकाली, गोश्वारा हुलाक, जमल, केशरमहल, लैनचौर, पानीपोखरी, महाराजगञ्ज, सुकेधारा, चाबहिल हुँदै एयरपोर्ट पुग्ने रुट निर्धारण गरिएको छ ।
शुक्रबार जनकपुर हुँदै काठमाडौं आएका मोदी अपराह्न चार बजे स्वदेश फर्किने छन् ।
