आइपीएलको फाइनल शो होस्ट गर्दै रणवीर, दुई घन्टाको पारिश्रमिक एक करोड

भारतमा जारी इन्डियन प्रिमियर लिगको फाइनल म्याच अगाडि आयोजना हुने भव्य कार्यक्रमको होस्ट बलिउड अभिनेता रणवीर कपुरले गर्ने भएका छन् । २ घन्टा लामो उक्त कार्यक्रम होस्ट गर्न उनले एक करोड भारु पारिश्रमिक पाएको भारतीय मिडियाहरुले जनाएका छन् ।

प्रतिभावान अभिनेता मानिने रणवीरसँग कार्यक्रम सञ्चालनको भने खासै अनुभव छैन । होस्टको रुपमा उनी पहिलोपटक नै ठूलो इभेन्टमा देखिने भएका हुन्, त्यो पनि मोटो पारिश्रमिक लिएर ।

यो कार्यक्रममा बलिउडका सलमान खान, ज्याकलिन फर्नान्डिज, करिना कपुर, सोनम कपुर जस्ता सेलिबि्रटीहरु पनि सहभागी हुँदैछन् । कार्यक्रमलाई ‘क्रिकेट फाइनल्स पार्टी तो बनती है’ नाम दिइएको छ । यो कार्यक्रम सकिएपछि आइपीएल २०१८ को फाइनल म्याच आयोजना हुनेछ । यसको प्रशारण २८ मेमा हुने जनाइएको छ ।

समाचारअनुसार कार्यक्रमको सुरुमा सलमान खान र ज्याकलिनले रेस ३ को गीतमा नृत्य गर्नेछन् । सलमानले क्रिकेटको आफ्नो अनुभव पनि पोख्नेछन् । शोमा सलमान-ज्याकलिनलाई अनिल कपुरको साथ रहनेछ । यसैगरी जोन अब्राहमले आफ्नो फिल्म परमाणुको प्रमोसन गर्ने कार्यक्रम छ । साथै थुप्र टिभी सेलिबि्रटीहरुले पनि कार्यक्रमको शोभा बढाउनेछन् ।