शुक्रबारदेखि रिलिज भएको चलचित्र ‘ब्ल्याक’ले शनिबार सिंगल हलमा राम्रो व्यापार गरेको छ । काठमाण्डौका गोपिकृष्ण, अष्टनारायण लगायतका हलमा यो चलचित्रको व्यापार अरु चलचित्रको भन्दा माथि रहेको हल संचालकहरुले बताएका छन् । शनिबार चलचित्रका मुख्य कलाकार आकाश श्रेष्ठ, आँचल शर्मा, आयुष रिजाल हल-हलमा पुगेका थिए । उनीहरुलाई दर्शकले सेल्फीका लागि घेरेका थिए ।
नायक आकाश श्रेष्ठले दर्शकबाट पाएको प्रतिक्रियाले आफू अत्यन्त खुशी भएको बताए । यसैविच, आज काठमाण्डौको कुमारी हलमा चलचित्रको ‘सेलिब्रिटी शो’को आयोजना गरियो । यो शोमा विभिन्न कलाकारलाई निम्ता गरिएतापनि नायक पल शाह मात्र पुगेका थिए । उनले, आकाश र आँचलको जोडी सुहाएको बताए ।
आश्मा फिल्मस्को ब्यानरमा निर्माण भएको यो चलचित्रमा आश्मा पाण्डे र चेतनकुमार पाण्डेको लगानी छ । प्रदिप श्रेष्ठले चलचित्रको निर्देशन गरेका हुन् । महंगो लगानीमा बनेकाले पनि यो चलचित्रलाई करिब २ साता शनिबारकै जस्तो व्यापार गर्न आवश्यक छ ।
