२५ भदौ, काठमाडौं । युएस ओपन टेनिसको पुरुष एकल तर्फको उपाधि छैठौं बरियताका नोभाक जोकोविचले जितेका छन् । तेस्रो बरियताका आन मार्टिन डेल पोत्रोलाई ६–३, ७–६ (७–४) र ६–३ को सेटमा हराउँदै जोकोविचले उपाधि उचालेका हुन् ।
सर्बियाका ३१ वर्षे जोकोविचले ग्राण्डस्लाम उपाधि जितेको यो १४ औं पटक हो । रोजर फेडेररले २० र राफायल नाडालले १७ पटक ग्राण्डस्लाम उपाधि जितेका छन् ।
यो जितसँगै जोकोविचले विश्व बरियतामा चौथो स्थानमा उक्लिएका छन् ।
२९ वर्षका अर्जेन्टिनी खेलाडी डेल पोत्रोले झण्डै १० वर्षपछि ग्राण्डस्लामको फाइनलमा खेलेका थिए । सन् २००९ मा युएस ओपन टेनिसको उपाधि जितेपछि उनी ग्राण्डस्लामको फाइनलमा खेलेको यो पहिलोपटक थियो ।
