१६, असोज, चितवन । चितवनको भरतपुर अस्पतालमा एक सुत्केरीको मृत्यु भएको छ । मंगलवार विहान नवलपरासीको अरुणखोलाकी ३० वर्षीया तुलसी मगरको मृत्यु भएको अस्पतालले जनाएको छ ।
अप्रेसन गरेको २४ घण्टा भित्रै सुत्केरीको मृत्यु भएको उपचारमा संलग्न चिकित्सक श्रीप्रसाद अधिकारीले जानकारी दिए ।
उनले गर्भवती महिलामा पल्मोनरी थोन्वोएम्वोलिजम्को समस्या देखिएका कारण मृत्यु भएको दावी गरे । यस्तो समस्या अप्रेसन गरेका विरामी, गर्भवती, क्यान्सर लगायतको रोगका विरामीलाई देखिने गरेको उनले बताए ।
सुत्केरीलाई सोमवार बेलुका १० बजेदेखि समस्या देखिएको र तत्काल आईसीयूमा भेन्टिलेटर राखेर उपचार गरिएपनि बचाउन नसकिएको उनले बताए ।
समस्या देखिएको पाँच घण्टापछि सुत्केरीको मृत्यु भएको डा.अधिकारीले जानकारी दिए । बच्चा भने सकुशल रहेको छ ।