१८ असोज, काठमाडौं । आउँदो दसैंलाई लक्षित गरेर काठमाडौं जगडोलमा रहेको जगडोल युवा क्लबले आउँदो २७ गते शनिबार चङ्गा चेट प्रतियोगिता आयोजना गर्ने भएको छ ।
चङ्गा चेट प्रतियोगितामा पहिलो हुनेलाई खसी, दोस्रो हुनेलाई बोका र तेस्रोलाई कुखुरा पुरस्कार दिइने क्बलका अध्यक्ष कपिल पौडेलले बताएका छन् ।
कार्यक्रममा चङ्गा आयोजकले उपलब्ध गराउने तर लट्टाई र धागो भने प्रतियोगीले नै ल्याउनुपर्ने नियम रहेको पनि उनले बताए ।
कार्यक्रमबाट पर्यटकीय स्थलको प्रचार प्रसार हुने र पुरानो सँस्कृतिको जगेर्नामा मद्दत पुग्ने क्लबका कोषाध्यक्ष सुवास पौडेलले बताए । प्रतियोगिताको सफल आयोजना र निरन्तरतामा आफूहरुले विचार गरेको उनको भनाइ छ ।
क्लबले बाहृय तथा आन्तरिक पर्यटन प्रबर्द्धनका लागि बुढानीलकण्ठ नगरपालिका वडा नं ११ स्थित जगडोल झण्डा पार्कमा चङ्गा चेटसँगै फुडफेस्टिभल तथा गीतसंगीतका कार्यक्रम पनि राखेको आयोजकले जनाएको छ ।
जसमा दर्शकका लागि एक हजार रुपैयाँको टिकटको पनि व्यवस्था गरिएको छ ।
