४ कात्तिक, हुम्ला । बाँदर धपाउन पड्काएको भरुवा बन्दुकको गोली लागेर हुम्लाको सर्केगाड गाउँपालिका–२ रिपमा एक जनाको मृत्यु भएको छ । मृत्यु हुनेमा स्थानीय २८ वर्षीय सुरेन्द्र कार्की छन् ।
सोही ठाउँका ४० वर्षीय रङ्गमल महताराले आफ्नो स्याउ फार्ममा आएका बाँदर धपाउन पड्काएको भरुवा बन्दुकको गोली गोठालो गएका सुरेन्द्रलार्इ लागेको थियो । घटनामा उनी गम्भीर घाइते भएका थिए ।
तत्काल उनलार्इ उपचारका लागि स्वास्थ्य चौकी, रिपतर्फ लैजाने क्रममा बाटोमै मृत्यु भएको हो ।
महतारालाई उक्त भरुवा बन्दुकसहित प्रहरीले पक्राउ गरी शनिबार राति नै जिल्ला प्रहरी कार्यालय सिमकोटमा ल्याएको प्रहरी प्रमुख उपरीक्षक रबिन श्रेष्ठले जानकारी दिए । थप अनुसन्धान जारी छ ।
