२५ मंसिर, काठमाडौं । च्याम्पियन्स लिग फुटबलमा मंगलबार राति समूह चरणको अन्तिम खेलमा स्पेनिस क्लब बार्सिलोन र इंग्लिस क्लब टोटनह्यामबीच खेल हुँदै छ ।
अघिल्लो चरणमा पुगिसकेकाले घरेलु मैदानमा बार्सिलोना दबावविहीन छ भने टोटनह्याम अघिल्लो चरणमा पुग्न संघर्षमा छ । समूह बी अन्तर्गत नै राति हुने इन्टर मिलान र पीएसभी इन्दोभेनको खेलमा टोटनह्यामको भाग्य टिकेको छ । इन्टर मिलान र टोटनह्याम दुवैको ५ खेलमा ७ अंक छ ।
यसैले नेपाली समयअनुसार मंगलबार राति पौने २ बजे हुने खेलको गहनता र केन्द्रीयता टोटनह्याममा नै देखिएको छ ।
के छ टिमको अवस्था ?
बार्सिलोनाका प्रशिक्षक एर्नेस्टो भालभर्देले आफूहरु जित्नपर्ने दबावमा नरहे पनि च्याम्पियन्स लिगको खेल भएकाले महत्वका साथ मैदान उत्रने बताएका छन् । उनले केही नयाँ खेलाडीलाई अवसर दिन खोजे पनि बार्सिलोनाको मैदानमा टोटनह्यामलाई सहज हुने छैन ।
बार्सिलोनाको अन्तिम १८ मा लुइस स्वारेजलाई राखे पनि उनमा घुँडाको समस्या रहेकाले मुनिरलाई खेलाउने सम्भावना रहेको छ । साथै मिडफिल्डमा कार्लेस एलेनाले पनि अवसर पाउन सक्छन् ।
टोटनह्यामका फुल ब्याक सर्जी अरिएर र किएरन ट्रिपियर चोटका कारण बार्सिलोनाविरुद्धको खेलमा हुने छैनन् ।
टोटनह्यामका प्रशिक्षक मोउरिसियो पोचेटिनोले आफूहरु राम्रो खेल खेल्ने मनस्थितिमा रहेको र दबाव महसुस नगरेको बताएका छन् । ‘इन्टर मिलानलाई कुनै डर छैन । हामीले पनि आफ्नै खेललाई ध्यान दिनुपर्छ । हामी जित्ने सोच बनाएर खेल्नेछौँ’ उनले भने ।
केही तथ्य र तथ्यांक
टोटनह्यामसँगको पछिल्लो तीन खेलमा बार्सिलोना अपराजित रहेको छ । साथै बार्सिलोनाले इंग्लिस क्लबसँगको पछिल्लो १२ खेलमा एक खेल मात्रै हारेको छ । जुन दुई वर्षअघि म्यानचेस्टर सिटीसँग हारेको थियो ।
सन् १९७७ पछि घरेलु मैदानमा इंग्लिस क्लबसँग खेलेका ३० खेलमा बार्सिलोना एक खेलमा (२००७ मा लिभरपुलसँग) मात्र पराजित भएको छ ।
साथै च्याम्पियन्स लिग अन्तर्गत घरेलु मैदानमा खेलेको पछिल्लो २८ खेलमा बार्सिलोना हारेको छैन । जसमा ८७ गोल गरेको छ भने १३ गोल खाएको छ । त्यसमा पनि कुनै पनि खेलमा एक गोलभन्दा बढी खाएको छैन ।
इंग्लिस क्लबविरुद्ध च्याम्पियन्स लिग खेलमा सबैभन्दा धेरै गोल गर्ने कीर्तिमान बार्सिलोनाकै लियोनल मेस्सीको नाममा छ । उनले २२ गोल गरेका छन् । उनीपछि धेरै गोल गर्ने क्रिष्टियानो रोनाल्डोको १२ गोल रहेको छ ।
च्याम्पियन्स लिगमा समूह चरणको अन्तिम खेलमा टोटनह्याम अहिलेसम्म पराजित भएको छैन । दुई खेल जितेको छ भने एक खेल बराबरी गरेको छ ।
यसपटक च्याम्पियन्स लिगमा टोटनह्यामले अवे मैदानमा जित निकाल्न सकेको छैन । एक खेल बराबरी गरेको छ भने एक खेल हारेको छ ।
टोटनह्यामका ह्यारी केनले च्याम्पियन्स लिगको ७ अवे खेलमा ७ गोल नै गरेका छन् । यसैले बार्सिलोनाविरुद्ध पनि उनको भूमिका प्रमुख रहने छ ।
