१६ माघ, काठमाडौं । सशस्त्र प्रहरी बल नेपालले युएनको शान्ति मिसनमा गएर फर्कने सशस्त्र प्रहरी कर्मचारीको भत्ता कटौती नगर्ने भएको छ ।
विगतमा विभिन्न प्रयोजनका लागि १५० डलर रकम कटौती हुँदै आएकामा यो वर्षदेखि व्यक्तिगत भत्ता कटौती नगर्ने व्यवस्था गरिएको सशस्त्र प्रहरी महानिरीक्षक शैलेन्द्र खनालले जानकारी दिए ।
खनालले भने, ‘यसै वर्षबाट संयुक्त राष्ट्रसङ्घको अनुरोधमा सशस्त्र प्रहरी बल नेपालबाट युएन मिसनमा सहभागी भएका सशस्त्र प्रहरी कर्मचारीले मिसनमा सहभागी भएबापत पाउने व्यक्तिगत भत्ता कट्टी गरिने छैन ।’
यसअघि सशस्त्र प्रहरी परिवार महिला सङ्घलाई अमेरिकी डलर ३५, पूर्वसशस्त्र प्रहरी सङ्घलाई अमेरिकी डलर ३५ र खेलकूद शाखालाई ८० डलर गरी १५० डलर भत्ताबाट कटौती गरी उपलब्ध गराउँदै आएकोमा अब भने कट्टी नगरी सम्बन्धित कर्मचारीले नै पाउने व्यवस्था गरिएको खनालले बताए ।
उनका अनुसार सशस्त्र प्रहरीले यसै वर्षबाट नेपाल एपीएफ अस्पतालमा उपचार हुन नसकेका दीर्घरोग लागेका बहालवाला कर्मचारी, पूर्वकर्मचारी र बहालवालाका सन्ततिका लागि कम्तीमा ५० हजारदेखि बढीमा एक लाख रुपैयाँसम्म निःशुल्क उपचार खर्च उपलब्ध गराउने व्यवस्था गरेको छ । गोताखोर प्रशिक्षण लिई विपद व्यवस्थापन कार्यमा साहसिक ढङ्गले विशिष्ट योगदान गर्ने सशस्त्र प्रहरी कर्मचारीका दुई सन्ततिलाई निःशुल्क अध्ययन गराउने व्यवस्थासमेत मिलाइएको छ ।
यसै वर्षबाट ७० वर्ष नाघेका पूर्वसशस्त्र प्रहरी कर्मचारीलाई वार्षिक जनही १२ हजार भत्ता दिने तथा बहालवाला पूर्वसशस्त्र प्रहरी कर्मचारी र उनका सन्ततिको शुभविवाहका लागि ब्याण्डबाजा निःशुल्क उपलब्ध गराउने व्यवस्था गरिएको सशस्त्र प्रहरी महानिरीक्षक खनाले जानकारी दिए ।
सङ्गठनमा कर्यरत कर्मचारी, पूर्वकर्मचारी, दुर्गम क्षेत्रका सर्वसाधारणसहितलाई लक्षित गरी यस वर्ष विभिन्न कल्याणकारी योजना ल्याइएको महानिरीक्षक खनालले बताए । उनका अनुसार मृत्यु भएका प्रहरी कर्मचारीका सन्ततिलाई विपन्नता र उत्कृष्टताका आधारमा १२ कक्षामा दुई जना र दुर्गम स्थानमा बस्ने सर्वसाधारणका दुई बालबालिकालाई नेपाल एपीएफ स्कूलमा निःशुल्क अध्ययनको व्यवस्था मिलाइएको छ ।
भूकम्पले प्रभावित पूर्व सशस्त्र प्रहरीका कर्मचारीलाई राहतस्वरुप २४ करोड ४९ लाख ६५ हजार वितरण गरिएको तथा राहत पाउन छुट भएकालाई कल्याणकारी कोषबाट रु एक करोड ६६ लाख ७० हजार वितरण गरिएको समेत खनालले जानकारी दिए ।
२२ करोड भन्दा बढी राजश्व सङ्कलन
सशस्त्र प्रहरीले पछिल्लो नौ महीनामा विभिन्न मालसामान बरामद गरी २२ करोड ७१ लाख राजश्व सङ्कलन गरेको छ । उक्त अवधिमा नौ थान भरुवा बन्दुक, नौ थान पेस्तोल, ४६ राउण्ड गोली, १०० ग्राम बारुद, पेस्तोलमा लाग्ने म्यागेजिन छ थान बरामद गरी नेपाल प्रहरीलाई बुझाइएको सशस्त्र प्रहरी बल प्रधान कार्यालय काठमाडौँले जनाएको छ ।
यसैगरी सो अवधिमा गाँजा चरेश ४२९ केजी, ब्राउनसुगर १६ ग्राम बरामद गरी नेपाल प्रहरीलाई बुझाएको, विपद् तथा जोखिम क्षेत्रमा फसेका चार हजार ८५ जनालाई उद्धार गरेको छ भने सोहि अवधिमा ७४७ मृतकको उद्धार तथा व्यवस्थापन गरिएको सशस्त्र प्रहरीले जनाएको छ । मङ्गलबार मात्रै दुई थान पेस्तोलसहित रौतहटबाट एक जना पक्राउ गरिएको जनाइएको छ ।
यस्तै सशस्त्र प्रहरीका १३६ लाई विपद् व्यवस्थापन तालीम दिई दक्ष जनशक्ति उत्पादन गरेको तथा विभिन्न आठ देशमा गएर १५२ ले विदेशी तालीम प्राप्त गरेको पनि सशस्त्र प्रहरी बल प्रधान कार्यालय काठमाडौंले जनाएको छ ।
