१८ माघ, काठमाडौं । नेपाल एयरलाइन्सका ८ वटा विमान सेवा दिन नसकेर ग्राउन्डेड छन् । अन्तर्राष्ट्रियतर्फका एक र आन्तरिकतर्फका ७ वटा विमान अहिले थन्किएका छन् । जसले गर्दा नेपाल एयरलाइन्सको आन्तरिक हवाई सेवा प्रभावित भएको छ ।
यसले गर्दा वित्तीय संकटमा फसेको निगमलाई ठूलो धक्का लागेको छ । यसले निगमलाई करोडौं घाटा लागिरहेको छ ।
अन्तर्राष्ट्रिय उडान भर्नेमध्ये एक न्यारोबडी विमान बिहीबार मात्रै सिंगापुरबाट ‘सि-चेक’ (नियमित परीक्षण र मर्मत) गरेर फर्किँदैछ । निगमको एक मात्रै बोइङ भने ग्राउन्डेड रहेको निगमका सहायक प्रवक्ता नवराज कोइरालाले जानकारी दिए ।
यसैगरी आन्तरिकतर्फका ६ चिनियाँ विमानमध्ये एउटा मात्रै विमान उडिरहेको छ । तीन वटा वाई १२ ई विमान अहिले पनि ग्राउन्डेड भएका छन् । यसमध्ये दुई वटा विमान उडान सकिने अवस्थामा रहेपनि पाइलट अभावले समस्या भएको कोइरालाले बताए ।
निगमका दुई पाइट सन्जयबादे श्रेष्ठ र नृपेन्द्र भट्टराईले विरामी विदा लिएकोले दुई चिनियाँ वाई-१२ ई जहाज थन्क्याउनुपरेको सहायक प्रवक्ता कोइरालाको दावी छ । ्
यसैगरी निगमसँग रहेको चिनियाँ एमए ६० विमान दुबै ग्राउन्डेड छन् । एउटा जहाज लामै समयदेखि ग्राउन्डेड भए पनि अर्को विमानमा पनि समस्या देखिएपछि मर्मतको काम चलिरहेको छ ।
निगमसँग रहका २ टि्वन अटर पनि ग्राउन्डेड छन् । एउटा विमानको पंखामै समस्या देखिएपछि लामो समयदेखि मर्मतमा छ ।
चलिरहेका एउटा विमानमा पनि समस्या भएपछि थन्किएको छ । विमान ग्राउन्डेड हुनुमा प्राविधिक कारण भनिए पनि पाइलट अभाव नै मुख्य समस्या भएको निगमका एक उच्च अधिकारीले बताए ।
निगमभित्र पाइटलको बढुवामा राजनीतिक चलखेल भएपछि असन्तुष्ट पाइटहरुले राजीनामा दिने र बिरामी विदा बस्ने क्रम बढेको छ ।
यसै समस्यालाई हटाउन भन्दै निगमले एकपटक ५० जना पाइलट भर्ना गर्न प्रक्रिया सुरु गरेको छ । ४० जना पाइलट माग्दै केही दिनमै लोकसेवा आयोगमार्फत सूचना निकालिने सहप्रवक्ता कोइरालाले बताए ।
‘पाइलट अभावको समस्या टार्न एकपटक ठूलो संख्यामा भर्ना गर्न लागेका हौं,’ कोइरालाले भने,’अहिले चिनियाँ विमान उडाउने र वाइडबडी विमान उडाउने विमान चालकको अभाव छ । त्यसलाई केही समयभित्रै पूर्ति गर्ने योजना बनाएका छौं ।’
