१६ फागुन, रामेछाप । नेपाली कांग्रेसका सभापति शेरबहादुर देउवाले नेपालको प्रजातन्त्र फेरि खतरामा परेको बताएका छन् ।
बिहीबार रामेछापको मन्थली नगरपालिका–९ पुराना गाउँमा टीकाराज आरणको शालिक अनावरण कार्यक्रममा देउवाले प्रजातन्त्र माथि प्रत्यक्ष र अप्रत्यक्ष रुपमा आक्रमण सुरु भएको बताएका हुन् ।
‘सरकाले विधेयकको नाममा प्रजातान्त्रिक अधिकार खोस्ने गरी काम गरिरहेको छ’, देउवाले भने । भोलि कुनै पनि बहानमा सहिदको वलिदान र रगतले स्थापना गरको प्रजातन्त्र खोसिन सक्ने बताउँदै देउवाले यो कुरा कांग्रेसलाई सैह्य नहुने बताए ।
वर्तमान सरकारले प्रत्यक्ष रुपले नेपालमा प्रजातन्त्रमाथि आक्रमण गरेको पनि देउवाले आरोप लगाए ।
नेपाली कांग्रेसका नेता टीकाराज आरणलाई २०५७ सालमा तत्कालीन माओवादी कार्यकर्ताहरुले घरैबाट नियन्त्रणमा लिई हत्या गरेका थिए । उनको स्मरणमा सो शालिक स्थापना गरिएको हो ।
