आज शुक्रबारदेखि रिलिज भएको चलचित्र ‘ए मेरो हजुर ३’को प्रिमियर पश्चात नव–नायिका सुहाना थापाको कामको तारिफ गर्दै सामाजिक संजाल भरिएका छन् । धेरैले नायिका सुहाना थापाको शानदार डेब्यू भन्दै प्रशंसा पनि गरिरहेका छन् । यसअघि यस्तो खालको प्रतिक्रिया नायिका साम्राज्ञी राज्यलक्ष्मी शाहले ‘ड्रिम्स’ चलचित्रबाट डेब्यू गर्दा पाएकी थिइन् ।
आखिर, सुहानाको यति धेरै तारिफ किन ? चलचित्र ‘ए मेरो हजुर ३’ नायिका थापाको होम प्रोडक्शनको चलचित्र हो । उनका पिता सुनिलकुमार थापाको लगानी र आमा झरना थापाको निर्देशनमा यो चलचित्र बनेको छ ।
चलचित्रको केन्द्रविन्दुमा नायिका सुहाना थापा नै छिन् । चलचित्रमा सुहानाले होस्टेलमा बस्ने आधुनिक यूवतीदेखि प्रेम गर्ने मायालु यूवतीसम्मको भूमिका निर्वाहा गरेकी छिन् । सुहानाको अभिनय उत्कृष्ट छ । उनले आफ्नो अनुहारमो अभिनयको उत्कृष्ट झलक ल्याएकी छिन् । चलचित्रमा देखिने हरेक परिस्थितीमा सुहानाले आफूलाई ढाल्नु नै उनको खुबी हो ।
चलचित्रको गीतमा उनको प्रस्तुती, संवाद बोल्दा उनको अभिनयमा देखिएको गहिराइले उनले सिंगो चलचित्र बोक्ने हिम्मत राखेकी छिन् । चलचित्र रिलिज अगाडि नायिका थापाको उचाइको बिषयमा थुप्रै खालका टिकाटिप्पणी भएका थिए । तर, चलचित्र हेरिरहँदा उनको अभिनयको उचाइले उनको हाइटलाई छोपिदिएको छ । यसकारण पनि सुहानाको यो चलचित्र ‘शानदार डेब्यू’ हो भन्न सकिन्छ ।
