४ बैशाख, काठमाडौं । काठमाडौं महानगरपालिकाका वडा नम्बर १४ को वडा कार्यालय भवनको शिलान्यास गरिएको छ ।
बल्खुस्थित भुवनेश्वरी मन्दिरको दक्षिणतर्फको २ सय ५३ दशमलब २४ बर्गमिटर (झण्डै ८ आना) जग्गामा निर्माण गर्न लागिएको वडा कार्यालय भवनको बुधबार एक कार्यक्रमका बीच महानगरपालिकाका प्रमुख विद्या सुन्दर शाक्यले शिलान्यास गरे ।
आउँदो १ बर्षभित्र निर्माण सम्पन्न गरिसक्ने गरी बुधबारबाटै निर्माण कार्य थालिएको वडा अध्यक्ष शोभा सापकोटाले बताइन् । जतिसक्दो छिटो भवन निर्माणमा सकेर वडाको कार्य सम्पादन र सेवा प्रवाह छिटो छरितो बनाउने उनले बताइन् ।
उनका अनुसार निर्माण थालिएको वडा कार्यालय भवनको भुँइ तलामा अण्डरग्राउण्ड पार्किङ हुनेछ । पार्किङमा झण्डै ३० वटा मोटरसाइकल अट्नेछ ।
यसबाहेक साढे ४ तलामा बन्ने भवनको कुल क्षेत्रफल ११ हजार ८२ दशमलब ८ बर्गफिट हुनेछ । यसमध्ये भूमिगत तलाको क्षेत्रफल १९१९.७९ बर्ग फिट र भुइँ तलाको क्षेत्रफल १७८९.०८ बर्गफिट हुनेछ ।
आरसीसी फ्रेम स्क्ट्रक्चरमा निर्माण हुने भवनमा लिफ्ट जडान हुनेछ । अब बन्ने भवन यो अपाङ्गमैत्री हुने उनले बताइन् । उनका अनुसार हरेक तलामा महिला र पुरुषका लागि छुट्टाछुट्टै शौचालय बनाउने गरी डिजाइन गरिएको छ ।
भवनमा दर्ता चलानी गर्ने ठाउँ, वडा क्लिनिक, कर्मचारी र जनप्रतिनिधिका लागि छुट्टा—छुट्टै र व्यवस्थित कार्यकक्ष, बैठक कक्ष, पुस्तकालय, प्राविधिक कक्ष, सहजकर्ता कक्ष हुनेछन् ।
भवन निर्माण सम्पन्न भइसकेपछि वडा क्लिनिक पनि त्यहींबाट सञ्चालन गरिने वडा अध्यक्ष सापकोटा बताउँछिन् । भवन निर्माणका लागि ५ करोड ५२ लाख ७२ हजार ४८१ रुपैयाँ ३५ पैसा लागत अनुमान गरिएको थियो । तर, पीआर बाबुरत्न जेभीले ४ करोड ३४ लाख ३३ हजार ६९२ रुपैयाँ ९० पैसा कबोल भवनको निर्माणको ठेक्का पाएको छ । २ वर्षभित्र निर्माण सक्ने लक्ष्य छ ।
अहिले भाडामा लिइएको भवनबाट वडा कार्यालयको कार्य सम्पादन हुँदै आएको छ । पर्याप्त ठाउँ नहुँदा जनप्रतिनिधि र कर्मचारी एउटै कोठामा बस्नु पर्ने अवस्था छ । सेवाग्राहीको चाप बढ्दा थेग्न नसक्ने अवस्था आउने गरेको वडा अध्यक्ष सापकोटाको भनाइ छ ।
यो पनि पढ्नुहोस बिन्दास वडाअध्यक्ष ! श्रीमानको पेन्सन, छोरा अमेरिकामा !
