२१ जेठ, विराटनगर । मधेसी आयोगका अध्यक्ष विजयकुमार दत्तले स्थानीय तहका लागि लोकसेवा आयोगले खुलाएको विज्ञापनमा त्रुटी रहेको बताएका छन् ।
मंगलबार विराटनगरमा सञ्चारकर्मीहरुसँग कुरा गर्दै दत्तले लोकसेवाको विज्ञापनमा समावेशी ‘क्वास्टर’ नछुट्याउनु त्रुटीपूर्ण भएको बताए । ‘लोकसेवा आयोग पनि संवैधानिक अंग हो, मधेसी आयोग पनि संवैधानिक अंग हो उनले भने, ‘विज्ञापन खुलाएपछि लोकसेवा आयोगमा पुगेर छलफल पनि गरेको छु ।’
आयोगले विज्ञापन खुलाएको विषयमा क्लास्टर नछुटाउँदा त्रुटि देखिएकाले ध्यानाकर्षण गराएको उनले बताए । संविधानको भावना विपरित विज्ञापन भएको बताउँदै उनले आयोगसँग थप छलफल गर्ने बताए ।
मधेसी आयोग गठन भएको तीन महिना पुगेको छैन । आयोग अहिले जनताको गुनासो सुन्ने क्रममै छ । यसक्रममा अहिलेसम्म ६९ वटा मिटिङ गरेको भन्दै आयोग प्रमुख दत्तले सरकारप्रति जनताको गुनासो बढी आएको बताए ।
उनका अनुसार नागरिकतामा समस्या देखिएको, भारतीय सवारी निर्वाध रुपमा चल्दा राज्यलाई नोक्सान पुगेको लगायत समस्याहरु उठेका थिए ।
