रवीन्द्र मिश्रको पार्टीको नामबाट विवेकशील गायब !

३० असार, काठमाडौं । रवीन्द्र मिश्र नेतृत्वको साझा विवेकशील पार्टीले आफ्नो नाममा विवेकशील शब्दको कम प्रयोग गर्ने भएको छ ।

यद्यपि औपचारिक दस्तावेजमा साझा विवेकशील पार्टी नै रहनेछ । पार्टीको नामलाई दिएर अन्यौल जस्तो देखिएकाले बोलीचालीमा साझा पार्टी मात्र भन्ने निर्णय गरिएको पार्टीका प्रवक्ता डा. सूर्यराज आचार्यले जानकारी दिए ।

उज्वल थापा नेतृत्वको समूह अलग भएर विवेकशील नेपाली दल बनाएपछि मिश्रको समूहले पार्टीको नाम विवेकशील साझाको सट्टा साझा विवेकशील बनाएको थियो ।

अब भने साझा पार्टी मात्र प्रयोग गर्ने भएको छ ।

‘रवीन्द्र मिश्रको विवेकशील र उज्जव थापाको विवेकशील भन्न थालेपछि हामीले बोलीचालीमा साझा पार्टी मात्र भन्ने निर्णय गरेका हौं’ आचार्यले भने, ‘पार्टीको औपचारिक दस्तावेजहरुमा भने साझा विवेकशील पार्टी नै रहन्छ ।’