७ भदौ, काठमाडौं । कार्यवाहक प्रधानमन्त्री एवम् नेकपा नेता ईश्वर पोखरेलले व्यक्तिहरुको गलत चिन्तनको कारण सार्वजनिक सम्पत्ति रक्षा गर्न चुनौती रहेको बताएका छन् । सार्वजनिक सम्पत्ति कब्जा गर्न पाए मजा मान्ने चिन्तन र प्रवृत्ति आफूहरुभित्रै रहेको उनले बताए ।
काठमाडौं महानगरपालिका वडा नम्बर ४ मा प्रदेश ३ सरकारद्वारा निर्मित ‘लम्टाङ्िगन टुसाल पार्क’ उदघाटन कार्यक्रमलाई शनिबार सम्बोधन गर्दै उनले सो धारणा राखेका हुन् ।
‘अहिले एउटा हाम्रो अगाडि चुनौति छ । सार्वजनिक सम्पत्तिको रक्षा कसरी गर्ने ? म तपाईंहरुलाई तोकेर भन्न चाहन्न । हामीभित्रै समस्या छन्,’ पोखरेलले भने ।
‘सार्वजनिक सम्पत्ति व्यक्तिले लिन पाए, कब्जा गर्न पाए, उपभोग गर्न पाए, मजा मान्ने चिन्तन र प्रवृत्तिहरु छन् । यो गलत चिज हो । यसको विरुद्धमा वास्तवमा हामी सबैले जुध्नुपर्छ । सार्वजनिक सम्पत्ति सबैको सम्पत्ति हो । जनताको सम्पत्ति हो । त्यसको रक्षा गर्नु हामी सबैको कर्तव्य हो ।’
पोखरेलले निर्वाचित भएका प्रतिनिधिहरुले मात्र नभई निर्वाचित नभएका आम सचेत नागरिकहरुले पनि सार्वजनिक सम्पत्तिको रक्षा गर्नुपर्नेमा जोड दिए ।
कार्यक्रममा काठमाडौं महानगरपालिकाका मेयर विद्यासुन्दर शाक्यले भूकम्पले क्षतिग्रस्त सम्पदाहरुको पुननिर्माणको कामले गति लिएको बताए । धरहरा, रानीपोखरी, काष्ठमण्डप लगायतका संरचना पुनर्निर्माणको धमाधम भइरहेको भन्दै जानकारी दिँदै उनले यस काममा कहीँ कतैबाट अवरोध गर्न नहुने बताए ।
