८ भदौ, काठमाडौं । शालिकराम पुडासैनी आत्महत्या प्रकरणमा टेलिभजन प्रस्तोता रवि लामिछानेसहित तीन जनाविरुद्ध आत्महत्या दुरुत्साहनको मुद्दा दर्ता भएको छ ।
केन्द्रीय अनुसन्धान ब्यूरो (सीआईबी)को सहयोेगमा १० दिन लामो अनुसन्धानपछि चितवन प्रहरीले सरकारी वकिलको कार्यालयमार्फत आइतबार लामिछाने, युवराज कँडेल र अस्मिता भनिने रुकु कार्कीविरुद्ध आत्महत्या दुरुत्साहनको मुद्दा दर्ता गरेको हो ।
लगत्तै वयान सुरु भयो । आइतबार अभियुक्त अस्मिता भनिने रुकु कार्कीको वयान सकिएको छ । तर, रवि र युवराज कँडेलको वयान बाँकी नै रहेकाले भोलि सोमबार बिहान १० बजे उपस्थित गराउने गरी तीनैजनालाई प्रहरी हिरासतमा पठाइएको जिल्ला अदालत चितवनका श्रेश्तेदार रुद्रमणि गिरीले बताए ।
तीनैजनाको वयान सकिएपछि थुनछेक बहस हुनेछ ।
मुलुकी अपराध संहिताको दफा १८५ अनुसार आत्महत्या दुरुत्साहनको मुद्दामा दोषी ठहर भए ५० हजारसम्म जरिवाना, ५ वर्षसम्म जेल वा दुबै सजाय हुन सक्छ ।
के-के भेटियो अनुसन्धानमा ?
प्रहरीले लामिछानेसहित तीनजनालाई दुई ५/५ दिन म्यान थप गरेर अनुसन्धान गरेको थियो । यसक्रममा पुडासैनीको मोबाइलमा बरामद भएको भिडियो क्लीपमा ‘छेडछाड’ नभएको प्रहरी प्रयोगशालाले रिपोर्टले देखाएको छ ।
अनुसन्धानलाई सघाउन चितवन पुगेका सीआईबीका प्रहरी उपरीक्षक (एसपी) दीपक रेग्मीले भने, ‘बरामद भिडियोमा ट्याम्परिङ (छेडछाड) भएको छ/छैन भनेर परीक्षणका लागि डिजिटल फरेन्सिक ल्याब (डीएफएल) मा पठाइएको थियो । ल्याबले छैन भन्ने रिपोर्ट दिएको छ ।’
रेग्मीका अनुसार भिडियोबाहेक थप प्रमाण संकलन भएको छ, जसबारे अनुसन्धान रिपोर्टमा उल्लेख गरिएको छ । अनुसन्धानका क्रममा प्रहरीले मृतक पुडासैनी र आत्महत्या दुत्साहनको आरोपमा लागेका ३ जनाको डिजिटल कनेक्सन खोतलेको थियो । लामिछाने, कँडेल र कार्कीको मोबाइलको कल डिटेल रेकर्ड (सीडीआर), लोकेशन लगायतका विषय केलाएको थियो ।
यो पनि पढ्नुस्र– शालिकरामको भिडियो काटकुट नभएको ल्याबको रिपोर्ट
तीनजनाको वयान पनि लिएको छ । त्यसक्रममा लामिछाने र कार्कीको वयान बाझिएको अनुसन्धान अधिकृत बताउँछन् । रविले यसअघि आफूले अस्मितालाई नचिनेको दाबी गरेका छन् भने अस्मिताले भने पुरानो चिनजान भएको बताएकी छन् ।
त्यसैगरी पुडासैनीको आत्महत्यालगत्तै लामिछाने र कँडेल कार्यरत संस्था न्यूज २४ टेलिभिजनले पनि अस्मितालाई पटक-पटक सम्पर्क गरेको पनि देखिएको छ ।
सयौंले गरे प्रदर्शन
टेलिभिजन प्रस्तोता लामिछाने पक्राउ गरेसँगै उनको समर्थनमा चितवनमा प्रदर्शन हुँदै आएको छ । आइतबार थुनछेक बहस हुने अनुमानका साथ सयौंको संख्यामा मानिसहरु प्रहरी कार्यालय र भरतपुरको चौबीसकोठीमा भेला भएर नाराबाजी गरेका छन् । लामिछाने निर्दोष भएकाले रिहा गर्नुपर्ने उनीहरुको माग छ । प्रदर्शनका क्रममा सामान्य झडपसमेत भएको छ ।
चितवन बाहेक काठमाडौंलगायतका केही शहरमा पनि लामिछानेका समर्थकले प्रदर्शन गर्दै आएका छन् ।
के हो पुडासैनी आत्महत्या प्रकरण ?
पत्रकार शालिकराम पुडासैनी लामो समय रवि लामिछाने प्रस्तोता रहेको ‘सिधा कुरा जनतासँग’मा कार्यरत थिए । हालै न्यूज २४ छाडेर उनी माउन्टेनमा आएका उनी २० साउनमा चितवनको एक होटलमा झुण्डिएको अवस्थामा भेटिए ।
आत्महत्या गर्नुपूर्व उनले लामिछाने, कुँडेल र कार्कीका कारण आफू मर्न बाध्य भएको भन्दै आफ्नो मोबाइलमा रेकर्ड गराएको भिडियो बाहिरिएपछि प्रहरीले ३० साउनमा तीनै जनालाई पक्राउ गरेको थियो ।
यो पनि पढ्नुहोस
पुडासैनी आत्महत्या प्रकरणमा ‘युट्युब ट्रायल’ को अभ्यास
