२९ भदौ, हेटौंडा । प्रदेश ३ को लागूऔषध कारोबार हुने जिल्लाको अग्रपंक्तिमा मकवानपुर परेको छ । प्रदेशअन्तर्गतका २ जिल्लामा भने कारोबार शून्य छ ।
नेपाल प्रहरीको गत आर्थिक वर्ष (आव) को तथ्यांकले प्रदेशका अन्य जिल्लाको तुलनामा मकवानपुरमा बढी लागूऔषध कारोबार हुने देखाएको हो ।
प्रहरीले सार्वजनिक गरेको तथ्यांक अनुसार, गत आव ०७५/७६ मा मकवानपुरबाट लागूऔषध कारोबारमा संलग्न २ सय ८ जना पक्राउ परेका थिए । यीमध्ये १ सय ४८ जनाविरुद्ध प्रशासनले मुद्दा चलाएको छ ।
प्रदेश ३ को लागूऔषध कारोबारको दोस्रो नम्बरमा छ, चितवन । प्रहरीका अनुसार गत आवमा यो जिल्लाबाट १ सय ५९ पक्राउ परेका छन् । समातिएकामध्ये ८८ ले मुद्दा खेपिरहेका छन् ।
प्रदेश ३ कै अर्को जिल्ला धादिङमा पनि लागूऔषध कारोबार हुने गरेको छ । गत आवमा धादिङबाट ५१ जना पक्राउ परेकोमा ३१ जनालाई मुद्दा चलाएर कारबाही अघि बढाइएको प्रहरीले जनाएको छ ।
यीबाहेक प्रदेश ३ को काभ्रेबाट ३५, सिन्धुलीबाट २६, नुवाकोटबाट ६, सिन्धुपाल्चोकबाट ३ र दोलखाबाट १ जना पक्राउ परेका छन् । प्रहरीको तथ्यांक अनुसार गत आवमा रसुवा र रामेछापमा लागूऔषधको शून्य कारोबार भएको छ ।
लागूऔषधसहित पक्राउ परेकाहरूबाट गत आर्थिक वर्षमा ४ हजार ४ सय २ केजी गाँजा, १ हजार ३ सय ७० केजी चरेस, १ सय ९२ ग्राम खैरो हिरोइन, १ हजार ६ सय ७८ ग्राम अफिम प्रहरीले बरामद गरेको छ ।
गाँजा र चरेससहित पाँच पक्राउ
यसैबीच, लागूऔषध गाँजा र चरेससहित मकवानपुरमा ५ जना पक्राउ परेका छन् ।
बिआर ०१ एफ ७९९८ नम्बरको भारतीय कारको एसीभित्र लुकाएर भारततर्फ जाँदै गरेको कारबाट ३ भारतीय पक्राउ परेका हुन् ।
पक्राउ पर्नेमा भारत मुजफ्फरपुर जिल्ला जिरोमाईल रोड दादर बस्नै २८ वर्षीय शिवराज सिंह, २४ वर्षीय ज्ञानीकुमार पासवान र भारत शिवहर जिल्ला तरिहानी छपरा बस्ने २४ वर्षीय राजु महत्तो छन् ।
उनीहरूलाई पूर्व–पश्चिम राजमार्गअन्तर्गत हेटौंडा–१५ बाट नियन्त्रणमा लिएको जिल्ला प्रहरी कार्यालय, मकवानपुरका प्रहरी उपरीक्षक मुकेश कुमार सिंहले जानकारी दिए ।
त्यस्तै १२ किलो ४ सय ग्राम गाँजासहित मकवानपुरको राक्सिराङ गाउँपालिका ४ कालिका दोभानबाट २ जनालाई प्रहरीले पक्राउ परेको छ ।
पक्राउ पर्नेमा कैलाश गाउँपालिका ८ बस्ने २६ वर्षीय राजकुमार थिंङ र २१ वर्षीय दीपेश थिङ छन् ।
दुवैस्थानबाट पक्राउ परेकालाई लागूऔषध नियन्त्रण ऐन २०३३ बमोजिम कारबाही हुने प्रहरीले जनाएको छ । ऐनमा लागूऔषध कारोबारमा संलग्नको प्रकृति हेरी २–१० वर्ष कैद र १५ देखि १ लाखसम्म जरिबाना हुने व्यवस्था छ ।