३० भदौ, काठमाडौं । नेपाल क्रिकेट संघ (क्यान) को विशेष साधारणसभा एक साता पछाडि सरेको छ ।

अन्तराष्ट्रिय क्रिकेट काउन्सिल (आईसीसी)का उपाध्यक्ष इमरान ख्वाजा र अमर शेख र राष्ट्रिय खेलकुद परिषद् (राखेप)का सदस्य सचिव रमेश सिलवालबीच सोमबार काठमाडौंमा भएको वार्तामा नयाँ सहमति जुटेको हो ।

अब असोज १० र ११ मा विशेष साधारणसभा हुनेछ, जसले क्रिकेट संघको नयाँ नेतृत्व चयन गर्नेछ ।

यसअघि स्वतन्त्र टोलीले ३ र ४ गतेका लागि विशेष साधारणसभा बोलाएको थियो ।

तर राखेपले आफूसँग अनुमति नलिएको, २१ दिन म्याद नदिएको र निर्वाचन समिति आफूले बनाउनुपर्ने भन्दै अधिवेशन रोक्न निर्देशन दिएको थियो । समाधानको संघारमा पुगेको विवाद बल्भिmने अवस्था आएपछि आईसीसीका उपाध्यक्ष ख्वाजा र स्वतन्त्र टोलीमा रहेका शेख नेपाल आएका थिए ।

सहमतिअनुसार अब स्वतन्त्र टोलीले क्रिकेट संघको साधारणसभा गर्न राखेपसँग अनुमति माग्नेछ ।

यो प्रक्रिया पुरा भएपछि साधारणसभा बोलाएको सार्वजनिक सूचना जारी हुनेछ । निर्वाचन भने आईसीसी प्रतिनिधि समेत रहेको स्वतन्त्र टोलीले नै गराउनेछ ।

यो पनि पढ्नुहोस राखेपको अनुमति नलिए क्रिकेट संघको चुनाव गर्न दिन्नँ

निलम्बन फुकुवा हुन्छः सिलवाल

आईसीसीसँग भएको सहमतिपछि राखेप सदस्य सचिव सिलवालले अक्टोबरमा बस्ने आईसीसी बोर्ड बैठकले नेपालको निलम्बन फुकवा गर्ने दाबी गरे ।

आईसीसीको बोर्ड बैठक १३ अक्टोबरमा बस्नेछ । सदस्य सचिव सिलवालले भनेका छन्, ‘क्यान निलम्बनको फुकुवाबारे छलफल भएको छ । उहाँहरु सकारात्मक हुनुहुन्छ । म आशावादी छु यहिबाट क्यानको फुकुवा हुनेछ र नेपाली क्रिकेटले निकास पाउनेछ ।’

नेपाली क्रिकेटको ग्रास रुटदेखि विकास गर्न आईसीसीसँग छलफल गरेको पनि राखेप सदस्य सचिव सिलवालले बताए ।